Bandera de Sri Lanka

De Wikipedia
Saltar a navegación Saltar a la gueta
Bandera de Sri Lanka
Flag of Sri Lanka.svg
Datos
Entidá Sri Lanka
Fecha d'adopción

22  de mayu de 1972

(49 años)
Proporción FIAV 111111.svg 2:1
Colores rojo oscuro (es) Traducir, mariellu, verde y naranxa
Cambiar los datos en Wikidata

La bandera de Sri Lanka (en cingalés ශ්‍රී ලංකාවේ ජාතික කොඩිය, romanizáu Śrī Laṃkāvē jāthika kodiya; y en tamil இலங்கையின் தேசியக்கொடி, romanizáu Ilankaiyin teciyakkoṭi), tamién nomada bandera Sinha o bandera del lleón, ye la bandera oficial del país dende 1972. De proporción 1:2, tien como fondu un campu doráu, dixebráu en dos partes. La esterna, qu'ocupa 2/3 del llargor de la bandera, tien nel centru un lleon doráu garrando una espada kastane na so pata delantera derecha. El lleón, que mira pa la izquierda, pal mástil, ta representáu sobro un fondu granate, y enmarcáu por cuatro fueyes doraes de bo, una en cada esquina del cuadru. El campu doráu separta esta parte de la otra, más estrencha, compuesta de dos bandes verticales del mesmu anchor de collores verde y naranxa, tando la verde averada al mástil y la naranxa al lleón, que tán inscrites tamién nel marcu doráu. El lleón y el campu granate que lu enmarca representen a los cingaleses, mentantu qu'el borde doráu y les cuatro fueyes de bo representen respeutivamente los conceptos budistes de mettā, karuṇā, muditā y upekshā. Les franxes verticales representen a les dos minoríes mayoritaries: la naranxa a los tamiles que viven nel país, tanto a los nativos del país como a los emigraos de la India, y la verde a los musulmanes de Sri Lanka.

Historia[editar | editar la fonte]

L'apaición del símbolu del lleón na heráldica de Sri Lanka remóntase al 486 e.C. cuando Vijaya, primer rei de Sri Lanka, aportó a la islla dende'l continente y traxo con elli un estandarte nel que taba representáu un lleón[1]. Esti símbolu parez que tuvo influyencia nos sos socesores nel tronu, una y bones foi usáu davezu por ellos y convirtiose nún símbolu de llibertá ya esperanza. Asina, el rei Dutugemunu púnxose, en 162 e.C., al frente de los sos soldaos pa facer frente a la invasión d'Ellalan (gobernante d'una fastera del sur d'India) llevando un estandarte nel que figuraba un lleón, dibuxáu amosando'l so perfil derechu, empuñando una espada, xunto con un símbolu del Sol ya otru de la Lluna[1].

Esti diseñu básicu siguió n'usu hasta 1815, cuando la Convención de Kandyan punxo fin al reináu del caberu rei nativu, Sri Vikrama Rajasinha, sustituyendo'l so estandarte real, que facía les veces de bandera del reinu de Kandy, pola Union Jack, la bandera británica, como bandera de la nación[1]. El gobiernu del Ceilán británicu, más sero, estableció la so propia bandera, y l'estandarte real de Sri Vikrama foi llevada a Inglaterrra y guardada nel Hospital Real de Chelsea[1].

A midida que'l movimientu d'independencia de la islla foi garrando puxu a entamos del sieglu XX, E. W. Perera and D. R. Wijewardena descubrieron la bandera orixinal del lleón en Chelsea[1]. Una semeya de so foi espublizada nel periódicu Dinamina, nuna edición especial pa recordar el centenariu de la perda del autogobiernu ya la independencia de la islla. La bandera, qu'enxamás fora vista pol públicu de magar la cayida del reinu de Kandy, llamó l'atención del públicu[1]. Un miembru del parllamentu de la islla, Mudaliyar A. Sinnalebbe[2], suxirió na asamblea llexislativa, el 16 de xineru de 1948, que la bandera del lleón había ser la bandera nacional. De resultes, de magar 1948 la bandera foi adoptada como la oficial del Dominiu de Ceilán. Sobro'l diseñu orixinal, sicasí, ficiéronse dos cambeos de diseñu: ún, menor, en 1953, y un rediseñu en 1972[1]. Esti rediseñu, fechu por un comité dirixíu por Nissanka Wijeyeratne na so condición de coordinador del comité creáu pal diseñu del emblema y la bandera nacionales[3], supunxo el cambéu de les cuatro puntes de llanza de les esquines de la bandera por cuatro fueyes de bo, col envís d'integrar na enseña referencies simbóliques a les minoríes étniques del país.

Banderes históriques de Sri Lanka

Referencies[editar | editar la fonte]

  1. 1,0 1,1 1,2 1,3 1,4 1,5 1,6 The Sri Lankan national flag, artículu na web del The Sunday Times Sri Lanka (4 de febreru de 2018).
  2. The proposer of the lion flag: Mudlr. Sinnalebbe, artículu del Daily News (4 de febreru de 2004).
  3. Sri Lanka flagge, artículu na web flaggenlexicon.de.