Bandera de Sierra Lleona

De Wikipedia
Saltar a navegación Saltar a la gueta
Bandera de Sierra Lleona
Flag of Sierra Leone.svg
Datos
Entidá Sierra Lleona
Fecha d'adopción

27  d'abril de 1961

(58 años)
Proporción FIAV 111111.svg 3:2
Colores verde claru, blancu y azul claru
Cambiar los datos en Wikidata

La bandera nacional de Sierra Lleona ye una bandera tricolor formada por trés bandas horizontales d'igual anchor y de collor verde, blanca y azul. Adoptada oficialmente el 27 d'abril de 1961 pa sustituir el Pabellón Azul británicu complementáu (defaced) col escudu d'armes de la colonia, tien sío la bandera de la República de Sierra Lleona dende qu'esta algamó la so independencia.

Historia[editar | editar la fonte]

Los británicos aportaron a tierres de l'actual Sierra Lleona en 1787, cuando un garapiellu de filántropos y abolicionistes mercaron 52 km² de tierra cerca de la islla de Bunce pa instalar ellí esclavos lliberaos, dando orixe asina a l'actual ciudá de Freetown. El territoriu convirtióse nuna colonia de la corona del Reinu Xuníu en 1808[1]. Demientres el periodu colonial Sierra Lleona usó el Pabellón Azul británicu complementáu col escudu d'armes del territoriu. Esti consistía nún círculu con una ilustración na qu'apaecíen un elefante, una palmera y delles montañes, amás de les lletres iniciales del nome del territoriu, S.L.. Sacante estes lletres el restu del escudu yera idénticu al escudu d'armes de la Costa del Oru, Gambia y la colonia de Lagos. Sierra Lleona consiguió tener un escudu d'armes propiu en 1914, y so bandera basada nel Pabellón Azul camudose pa espeyar el cambiu[2].

En 1960 el College of Arms (institución británica d'estudios heráldicos y vexilolóxicos) propunxo, y dempués aprobó, una nueva bandera y un nuevu escudu pal país, anticipándose a la independencia de la colonia al añu siguiente. Diseñose primeru l'escudu, y los sos collores predominantes (verde, blancu y azul) foron usaos tamién después pa crear la bandera[3]. La primer vez que foi izada foi na medianueche del 27 d'abril de 1961, momentu de la independencia efectiva del territoriu. Dos años dempués el gobiernu aprobó una llei que considera illegal l'insultu a la bandera del país y a les de los países amigos.

Diseñu[editar | editar la fonte]

Los collores de la bandera tienen un significáu políticu y cultural. El verde fai referencia a los recursos naturales del país -específicamente a la so agricultura y les sos montañes- y el blancu espeya'l deséu de xunidá y xusticia. L'azul evoca el puertu natural de Freetown, la capital del país, y tamién la esperanza de qu'el país pueda contribuyir a la paz mundial[4].

Particularidaes llegales[editar | editar la fonte]

La bandera de Sierra Lleona ye usada como bandera de conveniencia por barcos foriatos pola escasa regulación que tien el país en cuestiones del derechu marítimu. Esta circunstancia ye aprovechada por xente que quier dedicase a actividaes illegales, como la pesca fraudulenta, y tamién por barcos de países que, por tar embaxu de sanciones de les Naciones Xuníes, nun pueden comerciar si usen la bandera de so. La presión internacional llevó al gobiernu d'esti país a restrinxir l'usu del so pabellón como bandera de conveniencia. Asina, en 2010 dexó de permitir rexistrar barcos pesqueros[5], nún intentu d'impedir la pesca illegal tanto nes sos agües territoriales como n'agües internacionales, y en 2012 retiró diez barcos, que se pensaba que yeren de nacionalidá iranina, del so rexistru. Esto fízose de resultes de tener interceptao n'El Líbanu un barcu con bandera de Sierra Lleona que llevaba armes pa Siria.

Banderes históriques[editar | editar la fonte]

Referencies[editar | editar la fonte]

  1. Perfil de Sierra Lleona na web de BBC News (n'inglés)
  2. Smith, Whitney. Flag of Sierra Leone. Encyclopedia Britannica, 2013.
  3. Kindersley, Dorling. Complete Flags of the World, p. 81. Dorling Kindersley Ltd, 2008.
  4. Smith, Whitney. Flag of Sierra Leone. Encyclopedia Britannica, 2013.
  5. Sierra Leona acaba col usu del so pabellón como bandera de conveniencia pa los barcos pesqueros (Noticia de l'axencia Reuters)