Anwar al Farkadain
| Constelación | Osa Menor |
| Ascensión reuta α | 16h 17min 30,3s |
| Declinación δ | +75º 45’ 19’’ |
| Distancia | 97,3 ± 1,4 años lluz |
| Magnitú visual | +4,95 |
| Magnitú absoluta | +2,58 |
| Lluminosidá | 7,4 soles |
| Temperatura | 6400 K |
| Masa | 1,4 soles |
| Radiu | 2 soles |
| Tipu espectral | F5V |
| Velocidá radial | -9,5 km/s |
Anwar al Farkadain (η Ursae Minoris / η UMi / 21 Ursae Minoris)[1] ye una estrella na constelación boreal de la Osa Menor. De magnitú aparente +4,95, alcuéntrase a 97 años lluz del Sistema Solar. El so nome, d'orixe árabe, significa «el más brillosu de los dos magüetos/tenrales», en contraposición a Alifa al Farkadain, «el más tenue de los dos magüetos», denominación que recibe la estrella ζ Ursae Minoris. Curiosamente Alifa al Farkadain ye más brillosu que Anwar al Farkadain. Esta postrera ye tamién conocida pol nome de Alasco.[2]
Anwar al Farkadain ye una estrella nana blancu-mariella de tipu espectral F5V[1] —non bien distintu del Sol— anque más caliente qu'él, con una temperatura de 6400 K. La so lluminosidá, equivalente a 7,4 soles, ye mayor de lo que cabría esperar pa una estrella del so tipu espectral y temperatura, polo que se piensa que ta próxima a convertise nuna subxigante, esto ye, una estrella que remató la combustión del hidróxenu. Con un diámetru dos veces mayor qu'el del Sol, la so masa envalórase en redol a 1,4 mases solares.[3]
A diferencia del Sol, que la so velocidá de rotación ye de 2 km/s, Anwar al Farkaidan tien una velocidá de rotación enforma mayor, de siquier 76 km/s, emplegando menos de 1,4 díes en completar una vuelta, tiempu enforma menor qu'el periodu de rotación solar d'aprosimao 27 díes.[3]
