Amalio Rodríguez Vigón

Amalio Rodríguez Vigón
Vida
Nacimientu	Santuyano, 1889
Nacionalidá	España
Muerte	Xixón, 31 de xunetu de 1959 (69/70 años)
Estudios
Estudios	Universidá de Valladolid
Oficiu	médicu

Amalio Rodríguez Rodríguez, conocíu como Amalio R. Vigón (1889, Santuyano – 31 de xunetu de 1959, Xixón) foi un médicu asturianu especializáu en medicina interna.

Biografía

Fíu de Ricardo Rodríguez Vigón y de Adela Rodríguez García^[1] nació en Santuyano de Bimenes el 7 de xineru de 1889 pero pasó la so infancia na provincia de Lleón, en Matallana de Torío, onde'l so padre exercía de capataz de mines. Equí realizó los sos primeros estudios que depués completó nel Colexu de San Isidoro de Cervera de Pisuerga cuando la so familia treslladóse a esta ciudá palentina. Entamó a estudiar medicina na Universidá de Valladolid pero, tres dos años, tuvo que treslladase a Barcelona pa cumplir el serviciu militar, ciudá na que completó los sos estudios de llicenciatura. Más tarde realizó'l doctoráu na Universidá de Madrid.

En 1925, casóse con Josefina Telenti González, natural de Juárez (provincia de Buenos Aires) con quien tuvo cinco fíos. D'ellos, dos, Amalio y Ricardo, fueron tamién médicos, tradición que continuó dos xeneraciones más. La tercer xeneración, colos doctores Mauricio y Amalio Telenti (fíos de Amalio), Ricardo (fíu de Ricardo)^[2] y Arturo (fíu de Josefina) y la cuarta xeneración, con Guillermo Telenti (fíu de Mauricio) y Cósima Telenti (fía de Mario, hermanu de Mauricio y Amalio).

D'idees republicanes empecipióse bien llueu na masonería al ingresar el 5 de xunu de 1921 na loxa Xovellanos nᵘ 337 onde adopta'l simbólicu de Galeno. Dos años dempués abandona la loxa y ayuda a fundar, el 19 de xineru de 1923, un nuevu taller, la Respetable Loxa Riego. Pola so actividá masónica foi encausáu tres la Guerra Civil na causa sumarial nᵘ 295-44 del Xulgáu Especial nᵘ 1.^[3] Finó'l 31 de xunetu de 1959.

Oficiu

Empecipió la so carrera profesional en Vegamián al sustituyir mientres unos meses al médicu titular. Al rodiu 1917 coló a Xixón, ciudá a la que se treslladara parte de la so familia pa trabayar na construcción d'El Musel. En Xixón, el doctor Vigón diose a conocer atendiendo a enfermos de la gripe de 1918. Especializóse na llucha contra les enfermedaes venérees y de pulmón y corazón. En 1922, algamó plaza de médicu de dispensariu de profilaxis pública y pasó a ser direutor del Dispensariu de Xixón. Mientres esti tiempu impartió delles conferencies sobre temes médiques y políticu-sociales nel Atenéu Obreru de Xixón.

Bibliografía

Cabal, Melquiades (1976). 100 médicos asturianos. Uviéu: Richard Grandío. páxs. 413-416

Referencies

↑ «Bimenalia: genealogías» (castellán) (18 de xineru de 2014). Consultáu'l 31 de marzu de 2010.
↑ http://www.medicogijon.com/801-Historia-familiar.html
↑ Guerra, Víctor (2000). La masonería n'Asturies, 1850-1938. Uviéu: KRK. páxs. 165-167

Enllaces esternos

[1] «Bimenalia: genealogías» (castellán) (18 de xineru de 2014). Consultáu'l 31 de marzu de 2010.

[2] ttp://www.medicogijon.com/801-Historia-familiar.html

[3] Guerra, Víctor (2000). La masonería n'Asturies, 1850-1938. Uviéu: KRK. páxs. 165-167

[1]

[2]

[3]