Ala (zooloxía)

De Wikipedia
Ala d'una ave según Alberto Durero.

Les ales son estremidaes o apéndices que tienen solamente tres grupos d'animales: inseutos, aves, quirópteros y, d'antiguo, los pterosaurios†. De normal les ales utilícense pa volar, anque non tolos animales que les tienen son capaces de caltenese nel aire.

Dellos animales tienen membranes ente les pates y el cuerpu (como los dermópteros), o ente los deos (como la xaronca voladora) o ente costielles móviles (el reptil Draco volans), pero nun son abondos pa exercer el vuelu y nun se denominen ales; con elles solamente pueden entamar.

Inseutos[editar | editar la fonte]

Movimientu de les ales de los inseutos.

Nos inseutos les ales (una o dos pares) son espansiones del tórax. Nos inseutos, solo los adultos tienen ales en númberu, por regla xeneral, de dos pares, membranoses con nervaciones reticulaes más o menos abondoses, tresparentes o con coloraciones y matices diversos y plegables o non según que permanezan o non estendíes mientres el reposu. En dellos órdenes (coleópteros y ortópteros) tienen el primer par d'ales formáu d'una sustancia coriácea y córnea y entós a estes ales llámase-yos élitros. Nos lepidópteros (caparines) les ales son enforma mayores que nos demás órdenes. Tópense recubiertes d'un polvillo perfinu formáu d'un gran númberu d'escames de diversu color a les que débese la formosa coloración de les caparines.

Los calteres de les ales sirvieron a los entomólogos pa clasificar los inseutos por órdenes:

  • Coleópteros, con ales anteriores endurecíes formando un estoxu (koleos, "estoxu" y pteron, "ala").
  • Dípteros, con solo un par d'ales, les anteriores, una y bones les posteriores tán modificaes como balancinos (di, "dos").
  • Lepidópteros, con ales cubiertes d'escames (lepidos, "escama").
  • Tricópteros, con ales cubiertes de pelos (trichós, "pelo").
  • Isópteros, colos cuatro ales iguales (isos, "igual").
  • Ortópteros, coles ales rectes (orthós, "rectu").

Aves[editar | editar la fonte]

1. Remeres primaries, 2. Cobertores mayores, 3. Álula, 4. Remeres secundaries, 5. Cobertores secundaries mayores, 6. Cobertores secundaries medianes, 7. Cobertores secundaries menores, 8. Remeres terciaries, 9. Escapulares

Nes aves les estremidaes anteriores son les que-yos dexen el vuelu y porten les plumes que formen la superficie sustentadora que-yos dexa volar.

Les plumes remeres son les grandes plumes de les aves, les que mayor importancia tien a la de volar. Combinen robustez, llixereza y flexibilidá.

Les remeres primaries, ye dicir les plumes llargues del cantu de l'ala, son responsables en gran midida de la potencia del vuelu. Pa siguir el so aldu, l'ave puede abrir o cerrar les que s'atopen asitiaes na parte más esterna.

Les remeres secundaries son, polo xeneral, curties. Trabayen menos mientres el vuelu, los sos cañones son tamién más curtios y tán menos firmemente fondiaes na carne. Sacante delles plumes de parada nupcial, tienen una forma más regular que les remeres primaries.

Les remeres secundaries empobinense nel sentíu del vientu. Poro, nun precisen tener una forma escorada pa favorecer l'emburrie elevador como les remeres primaries.

Les ales de les aves ufierten una variedá estraordinaria. Hailes como les de los pingüinos qu'escarecen de plumes y tópense amenorgaes a verdaderos muñones aptos solu pa la natación. Otres, como les del quivi (Apteryx), son más rudimentaries entá y tán cubiertes de plumaxe similar a pelo. Nes avestruces y delles gallinácees, les ales caracterícense pol so escasu desarrollu. Sicasí les aves de vuelu ufierten un gran desarrollu, entá cuando presenten ente elles notables diferencies pos les hai curties, anches y arrondaes na punta y estreches, allargaes y bien agudes na so estremidá. Por regla xeneral, les aves de vuelu enllargáu (grulla, oca, garza real, etc.) tienen les ales llargues y anches y les de vuelu rápidu (golondrina, albatros, martinetes, etc.) tiénenles llargues pero muncho más estreches.

Quirópteros[editar | editar la fonte]

Morfoloxía de l'ala d'esperteyu.

Nos mamíferos quirópteros (esperteyos) les estremidaes anteriores y los deos crean un soporte pa una membrana que-yos dexa'l vuelu. Son los únicos mamíferos capaces de volar (vuelu activu, nun entamo). L'ala ye una mano abierta cubierta per membrana (patagio), el vuelu ye lentu y de gran maniobrabilidad (a diferencia de les aves).


Referencies[editar | editar la fonte]

Enllaces esternos[editar | editar la fonte]