AE Aquarii

De Wikipedia
Saltar a navegación Saltar a la gueta
AE Aquarii
AE Aquarii
Representación artística del sistema AE Aquarii.
Constelación Acuariu
Ascensión reuta α 20h 40min 09,16s
Declinación δ -00º 52’ 15,1’’
Distancia 332 años lluz
Magnitú visual +10,40 a +12,56
Magnitú absoluta ?
Tipu espectral D / K3-5IV-V
Velocidá radial -53 km/s

AE Aquarii (AE Aqr / HIP 101991 / GCRV 71273) ye una estrella variable na constelación d'Acuariu asitiada a 332 años lluz del Sistema Solar. Ye una estrella binaria interactuante, onde esisti tresferencia de masa ente los dos componentes, una nana blanca y una estrella naranxa; gas procedente d'ésta última cai n'espiral escontra la nana blanca y calezse, produciendo una emisión de rayos X blandos. De resultes, AE Aquarii ye una variable cataclísmica qu'esperimenta cambeos impredicibles nel so rellumu, que varia ente magnitú aparente +10,40 y +12,56. El periodu orbital del sistema ye de 9,89 hores.

En 2005 y 2006, observaciones llevaes a cabu col satélite Suzaku dieron a conocer que la nana blanca d'AE Aquarii emite pulsos de rayos X duros a midida que xira sobre la so propia exa; estos pulsos coinciden col so periodu de rotación de 33 segundos. Esti comportamientu ye similar al del Pulsar del Cámbaru y el mecanismu que da orixe a los pulsos provién del fuerte campu magnéticu de la estrella compacta. Delles nanes blanques como AE Aquarii xiren bien rápido y tienen campos magnéticos millones de vegaes más fuertes qu'el de la Tierra. Piénsase qu'estos campos magnéticos prinden partícules cargaes que depués unvien al espaciu a velocidaes cercanes a la de la lluz. Cuando les partícules interactúan col campu magnéticu, irradien rayos X.

AE Aquarii constitúi'l primer casu onde una nana blanca pórtase como un púlsar. Puesto que los púlsares son conocíos como fontes de rayos cósmicos, el peculiar comportamientu d'AE Aquarii suxure que les nanes blanques pueden contribuyir en gran midida a la creación de rayos cósmicos de baxa enerxía en nuesa galaxa.

Referencies[editar | editar la fonte]