Arte romanu

L'arte romanu ye'l nome que reciben les artes visuales realizaes tanto na Antigua Roma como nos territorios del Imperiu Romanu. Inclúyense nesti conceutu l'arquiteutura, les obres públiques, la pintura, la escultura y el mosaicu, pero tamién oxetos de lluxu, de marfil o de cristal. L'arte romanu, que recibe al principiu influyencies del arte etruscu, va recoyer llueu les del Arte griegu, influyencia esta que va ser mayor cuando nel sieglu II Roma ocupe la península griega.

Etapes

Etruria y la formación del arte romanu

Arte romanu tardorrepublicanu

Roma conquista Grecia nel añu 146 e.C. Pérgamo pasa tamién a ser, siguiendo’l deséu del so rei, propiedá del Senáu ya los romanos nel añu 133 e. C. Entramos asina nel tiempu de los consulaos de Cayu Mariu (82-79 e. C); de la dictadura de Sila (82-79 e. C.); del Primer Triunviratu (60 e.C), con Pompeyu, Crasu ya César; de la dictadura d'esti últimu (49-44 e.C) y de les lluches del Segundu Triunviratu hasta la derrota de Marcu Antoniu en 31 e.C ya la conquista d'Augustu del reinu helenísticu d'Exiptu.

El retratu romanu

Consérvense dos obres, con fecha circa 100 e. C., que son esllabón ente Etruria y Roma: una d'elles ye la cabeza votiva en terracota de Caere, la otra l'Arringatore del Muséu de Florencia. Dambes conserven con exactitú los rasgos físicos al empar que la influyencia etrusca. Por embargu’l retratu romanu naciera tiempu atrás, pues esiste la costume llocal nos patricios de les imagines mairoum, imaxe realista ya de cera del fináu, que se guarda en relicarios de madera, y que col tiempu va sustituyise con cabeces de terracota, bronce y mármole (quiciabes por influyencia griega), y ente les que predominen les de homes vieyos.

Sicasí, esisten nesta dómica otru tipu de retratos nos que sí puen apaecer con normalidá muyeres y mozos, obres d'estilu más helenísticu, y ente les que podemos destacar el llamáu Mariscal de Tívoli, na que podemos ver l'esfuerciu del artista por llevar a la obra’l desnudu heroícu griegu al empar que la cabeza de tipu realista. Nos años postreros de la República van destacar los retratos de los más importantes políticos del momentu: el Cicerón de la Coleición Tortonia (circa 70 e C.) o'l Pompeyu de los Museos Vaticanos (49 e. C)

Arquiteutura

Templu de Portuno, Roma, enantes llamáu Templu de la Fortuna viril, con podiu etruscu, lo mesmo que la planta, y nel que los elementos griegos s'adauten perfeutamente al conxuntu.

Santuariu de la Fortuna en Palestrina

Tabularium de Roma

Pompeya pasa a ser colonia en tiempos de Sila, ya podemos atopar nella nueves formes arquiteutóniques -por exemplu'l primer exemplu de basílica que conocemos-, amás d'edificios como’l teatru y l'anfitetratu, de gran importancia histórica al ser tovía los de Roma de madera. Otru edificiu de gran futuru son les termes, una construcción que pue basase nel ximnasiu helenísticu, al que se-y amiesta un sistema de calentamientu, l'hypocaustum, creación del inxenieru Caius Sergius Orata.

La casa pompeyana surde na segunda metá del sieglu II e. C. Divídise en dos partes que ponen en rellación les formes de vida romana ya griega: la parte d'alantre, l'abierta a la cai, sigue col esquema etruscu datrium, tablinum o tabulinum, ya habitaciones o cubiculum, con impluvium pa recoyer l'agua de lluvia. Ye l'espaciu oficial, ellí onde’l pater familias celebra los cultos énte les imagines maiorum y onde tamién va recibir a los sos clientes. Pa evitar que’l tablinum seya llugar de pasu la comunicación ente latrium y el peristylium va facese per un corredor llamáu andron. Asina, la parte interior tien un peristylium griegu ya una piscina. El llamáu primer estilu pompeyanu intenta imitar el recubrimientu de plaques de mármole; en tiempos de Sila apaez el segundu estilu pompeyanu, con plantegamientos más complicaos ya ilusionistes (Frisu de la Villa de los Misterios, circa 60 e. C., o decoración de la villa d'Oplontis)

Augustu y l'arte del sieglu I d.C

Teatru de Pompeyu según el mármole *Forma Urbis Romae* de tiempos de Septimius Severus

Al principiu del añu 44 e. C. Roma entama a superar l'aspeutu d'urbe etrusca -con un Foru mal urbanizáu que nun tien edificios de referencia; igualmente nun se permitía la construcción de graderíos estables pa la plebe). Esta situación entama a cambiar cuando Pompeyu manda construyir el primer teatru estable en 65-55 e.C., con una cavea sobre arqueríes superpuestes. Xuliu Cesar va acometer los trabayos nel Foru: la Basílica Xulia y la Curia Xulia van sustituyir obres anteriores más probes. Nel Campu Marciu llevántese edificios como los Saepta Xulia. Edifícase un foru nuevu, el Foru Xuliu, con pórticu y dedicatoria a Venus, que va marcar l'entamu de la construcción de los Foros Imperiales. Les guerres civiles paralicen estes obres. Sicasí, resultáu tamién d'esti tiempu son los Diez llibros d'Arquiteutura que Vitrubio, inxenieru militar de César, va dedicar a Augustu nel añu 28 e. C.

Arquiteutura augustea

Yá nel poder, Augustu nun fai casu de les idees de Vitrubio que pa esi tiempu yá pasen por mui tradicionales, pero pon interés en terminar los proyeutos de César. Consciente del valor propagandísticu de los monumentos, comienza el llabor de, según Suetonio, “dejar de mármole la ciudá que recibiera de barru”. A esi efeutu ye nesta dómina cuando los lladriyos cocíos pasen a ser elementu básicu de cualesquier construcción y cuando entama la esplotación del mármole de Carrara. Tamién va ser agora cuando'l tradicional opus incertum se convierte nel yá más decorativu opus reticutalum.

D'esti tiempu son edificios como'l Templu de Cástor en Roma, el propiu Foru d'Augustu, el teatru Marcelu, la Maison Carrée de Nimes o pontes ya acueductos como los de Tarragona y Nimes (Pont du Gard), amás del Mausoléu d'Augustu.

Artes figuratives

Ara Pacis, Roma (13-9 e. C.).

A la vuelta de les campañes d'Hispania y la Galia Augustu celebra por fin un sacrificiu solemne pa conmemorar la paz nel imperiu, ya tresforma l'altar de madera utilizáu nesi día nún monumentu de mármole blanco. Decórase con roleos el frisu esterior, y sobre esti preséntense trés iconografíes: la lloba ya Rómulu y Remu, el sacrificiu d'Eneas, Roma ya Italia; nos llaos llargos dos frisos recuerden la procesión del añu 13 e. C.: nel costáu norte destaca’l Senáu, mientres que nel llau sur apaecen los principales sacerdotes y la familia imperial, con Augustu ya Agrippa.

Augustu de Prima Porta (20 e. C)

Estátua de César Augustu, foi descubierta’l 20 d'abril de 1863 en la Villa ad Gallinas Albas o Villa de Livia, cerca de la Prima Porta de Roma, llugar al que se retirara, al morrer l'emperador, la so muyer Livia. Ye una copia en mármole d'un modelu en bronce fechu con anterioridá. Inspirándose nel Doríforo de Policleto, obra del sieglu V e. C., l'emperador preséntase equí como una figura d'unos 2 metros d'altura y en contrapposto, personificáu como como toracato -de militar y con coraza-, sosteniendo un bastón de mandu consular, llevantando la mandrecha mientres la manzorga sostién el paludamemtum o capa de los comandantes militares. Ye destacable la decoración de la coraza, na qu'ente otros apaecen Marte, el dios de la guerra, asina como personificaciones de dellos territorios: Hispania, Galia, Xermania o Partia.

Otros

Son obres tamién a destacar d'esti periodu'l Retratu d'Agrippa (25 e. C) y el llamáu Grupu de San Ildefonsu del Muséu del Prado de Madrid.

En tiempos d'Augustu les columnes en relieve propies del llamáu segundu estilu pompeyanu desapaecen, dando llugar a un nuevu estilu, el llamáu tercer estilu pompeyanu, nel que la muria vuelve a tener un caráuter más planu, con paneles y una estructura central que va dar a la parede la forma d'un retablu.

Arquiteutura del sieglu I

A la muerte d'Augustu nel 14 d. C. llega al poder Tiberiu, con quien entama la dinastía xulio-claudia, con Calígula, Claudiu ya Nerón. A estos van asocedelos Galba, Otón y Viteliu enantes de que por fin llegue al tronu Vespasianu (69-79), Tito (79-81) y Domicianu. El sieglu va terminar col gobiernu de Nerva (96-98).

Son obres a destacar d'esti periodu les siguientes:

Transitorium, nos Foros imperiales, termináu en tiempos de Nerva

Porta Maggiore, que se construye en tiempos de Claudiu, al igual que’l puertu d'Ostia.

Coliséu o Anfiteatru Flaviu, que s’empieza a construyir en tiempos de Vespasianu y se termina en tiempos de Tito, y que tenía capacidá pa más de 50.000 persones

Domus Aurea, que Nerón manda construyir en Roma llueu del fueu del añu 64, y qu'encarga a los arquiteutos Severu y Céler.

Palatium, que s’empieza a construyir en tiempos de Vespasianu y se termina en tiempos de Domicianu, obra del arquiteuto Rabiriu

Tamién ye nestos tiempos cuando en ciudaes orientales como Palmira se van construyir teatrales columnates

Artes figuratives en tiempos de les dinastíes claudia ya flavia

El sentíu más progandísticu de tiempos d'Augustu va perdiéndose, al tiempu que desapaez tamién l'estilu más clasicista y va volviéndose a tradiciones más helenístiques.

De tiempos de Tiberiu ye’l taller que formen Atenodoro, Hagesando ya Polidoro, autores de dellos grupos decorativos d'estilu rodiu pa la villa imperial de Sperlonga, y que reinterpreten l'estilu de Pérgamo na famosa escultura de Laoconte.

Con Calígula, pero sobre manera con Claudiu, la retratística imperial va tornándose más claroescura ya intenta acercase más a la sicoloxía del retratáu (Retratu de Nerón, circa 55 d. C.). En tiempos de Vespasianu ya Tito esti realismu tornáse aún más fuerte (Retratu de Tito, circa 79-81 d.C.), con una estética siempre de carauterístiques helenístiques llena de movimientu ya gran plasticidá. Nesti tiempu llevántase tamién l'Arcu de Tito en Roma pa conmemorar la victoria sobre los xudios, y nel que'l relieve consigue gran fondura.

Finalmente, nel llamáu cuartu estilu pompeyanu, la parede ye de nueves un gran decoráu teatral, complicándose amás la decoración con fines columnes, paneles de cuadros, teles decoratives y otros detalles.

La era de los Antoninos y de los Severos

A Nerva asocédelu como emperador Traxanu (98-117), primer emperador que naz fuera d'Italia. Siguen Adrianu (117-138), Antoninu Píu (138-161), Luciu Veru ya Marcu Aureliu (161-180) y Cómodu (180-192). Con Séptimiu Severu (193-211) entama la dinastía severania, que tien como emperadores a Caracalla (211-217), Heliogábalu (218-222) ya Severu Alexandru (222-235).

De tiempos de Traxanu son obres a destacar los llamaos Mercaos de Traxanu (107-110 d.C.) y l'Arcu de Beneventu, amás de la Columna Traxana, obra de 113 d. C. Obres del tiempu d'Adrianu'l templu de Venus y Roma y la Villa d'Adrianu en Tívoli, faciéndose amás mui popular la iconografía d'Antínoo. El primitivu Panteón que mandara construyir Agrippa vese dañáu por una quema en 80 d.C, y si bien ye Domicianu quien ordena una primer restauración, ye Adrianu quien manda facer una obra nueva na que va caltener el recuerdu al fundador.

El más importante arquiteutu d'esta dómina ye Apolodoro de Damascu, autor d'una Poliorcética de la que namás que mos queden fragmentos. Obres suyes son la ponte del Danubiu (de 1700 metros de llargor), les Termes de Traxanu y, sobre manera, el Foru d'esti emperador.

Otres obres principales d'esti periodu son:

Estatua ecuestre de Marcu Aureliu (166 d. C)
Retratu de Cómodu como Hércules (190 d.C)
Termes de Caracalla (212-217 d.C.)
Arcu de Septimiu Severu (203 d. C.)

De l'anarquía militar al Baxu Imperiu

Nel sieglu III, tiempu d'anarquía militar en Roma, la producción artística decai al nun tener l'emperador riqueza abondo pa mantener l'arte oficial. Los mosaicos y dellos sarcófagos son les obres de mayor interés esta dómina. Galienu (253-268) entama’l llabor de restaurar l'arte, lo que va suponer, n’escultura, una vuelta estilística al periodu de los Severos. En tiempos d'Aurelianu (270-275) contrúyense en Roma los Muros Aurelianos. La recuperación entra na su fase más fecunda cuando, en 285, Dioclecianu crea’l sistema de la Tetraquía.

Obres d'esti periodu son:

Termes de Dioclecianu
Basílica de Maxenciu ya Constantinu en Roma (307-313 d.C)
Mausoléu de Galeriu en Tesalónica
Palaciu de Dioclecianu
Arcu de Galeriu, tamién en Tesalónica

Bibliografía

GARCÍA Y BELLIDO, A. Arte romano. C.S.I.C, Madrid, 1972
J. A. RAMÍREZ. Historia del arte. El mundo antiguo. Alianza Editorial, Madrid, 1996
WARD-PERKINS, J. B. Arquiteutura romana. Aguilar, Madrid, 1976.
SUETONIO, C. Vida de los doce césares. Obra completa. Madrid, Editorial Gredos

Referencies

Enllaces esternos