Tiuya (parroquia)

Tiuya (Tuilla en castellanu) ye una parroquia del conceyu asturianu de Llangréu. Asitiada na fastera más oriental del mesmu, nel valle del Candín, llenda col conceyu de Siero al norte, col de Samartín del Rei Aurelio al este y el sur y cola parroquia llangreana de La Felguera, na que taba integrada hasta finales del sieglu XIX, al oeste. Tien una estensión de 9,62 km² y una población de 1.429 habitantes (INE, 2010). 805 d'ellos viven nel llugar homónimu, y el restu repártense ente los llugares d'Antuña, Baeres, La Braña, La Braña'l Río, El Camonal, La Caperal, El Carboyu, La Casa'l Contu, El Monte, La Casanueva, La Casona, El Ciacal, La Coroña, La Cotariella, El Coz, El Cuitu, La Espinera, Gargantá, La Güelga, La Güeria, El Molín del Coz, El Molín del Rozóu, La Moral, La Mudrera, La Mudrerina, Otero, Les Peñes, Refozones, El Reguerín, Ricarión, El Rozóu, La Tornera, La Baldre, La Vallina, Campanal, El Molín de la Maña, La Re Miguel, El Reguerón, El Vallucu, La Gallina, L'Azorera, El Fondaque, La Navaliega, Roíles, El Terrerón y El Trechuru.

La zona ye rica en carbón, que s'esplota dende 1787. En relación con los trabayos mineros fízose, en 1952, la barriada de Tiuya, con 282 viviendes pa mineros que colaron pa elles dende les aldees de la rodiada. Nella hai estación de tren, campu de fútbol (ú xuega'l Club Deportivu Tiuya), ambulatoriu, bolera y dellos comercios que la convierten nel centru de l'actividá de la parroquia.

Personaxes Cellebres

Nesta parroquia ye u ñació y vivió David Villa, anguaño xugador del Fútbol Club Barcelona y tamién internacional cola Seleición masculina de fútbol d'España.

Bibliografía

• Espediente colos topónimos oficiales de Llangréu
• VV.AA., Diccionario geográfico de Asturias. Editorial Prensa Asturiana, Uviéu, 2000.

Enllaces esternos

• Páxina personal sobro Tiuya