Zanshin

De Wikipedia

Zanshin (残心) ye un términu usáu nes artes marciales xaponeses a respeutive d'un estáu de conciencia, o vixilancia serena. La traducción lliteral de zanshin ye "mente que permanez".

En delles artes marciales, zanshin refierse nun sen más llasu a la postura corporal que se caltién acabante executar una téunica.

Zanshin nes artes[editar | editar la fonte]

Nel Kyudo, zanshin refierse a la postura corporal dempués de dexar salir la flecha. Téntase de que la postura reflexe’l significáu cimeru de zanshin, ello ye l'aspeutu mental calteníu enantes de l'aición, n’aición y dempués de l'aición..

Nel Kárate, zanshin ye l'estáu de conciencia total. Significa tar sollerte del arrodiu y de los enemigos d'ún al tiempu que se ta preparáu pa reaicionar.

Nel contestu del Kendo, zanshin ye l'estáu d'espíritu que permanez, la vixilancia mental y la preparación física pa facer frente a la situación (un ataque contrariu por exemplu) que ye preciso caltener cuando se vuelve al kamae dempués del ataque. Ye ún de los elementos esenciales que definen un bon ataque.

Na práutica del Aikido, el métodu normal de prauticar zanshin ye centrase nel uke, o contrariu, qu'acaba ser proyeutáu, al tiempu que s’adopta kamae y se caltién la vixilancia por si hai más ataques o atacantes. Nel entrenamientu del estilu Iwama, el zanshin prautícase como vixilancia xeneral de la redolada d'ún, de la qu'uke sólo ye una pequeña parte.

En pallabres del maestru Zen Anzan Hoshin:

"Zanshin" significa “mente que permanez” pero tamién “mente ensin restu.” Ello ye la mente de l'aición completa. Ye’l momentu del Kyudo (arquería Zen) cuando se llibera la flecha. Na práutica “oryoki”[1] y de beber l'agua d'enxagüe ye l'“om makurasai sowaka”. Nel “shodo”, [2] ye acabar el trazu del pincel y alloñar la mano y el pincel del papel moviéndolos suavemente. Al dar un pasu, ye’l pesu banciando suavemente al tiempu que se da’l siguiente pasu. Al alendar a fondu, ye esti aliendu. Al echar dafechu l'aire, ye esti aliendu. Na vida, ye esta vida que se vive. Zanshin significa completar dafechu, en sin dexar buelga. Significa cada cosa, ensembre, como ye. Cuando cuerpu, respiración, fala y mente tán dixebraos y esperdigaos en conceutu y estratexa, denguna aición verdadera pue revelase. Sólo esiste la dulda o tentar d'esforciase pa superar la dulda. Esta ye la mente de la esperanza y el mieu, que surde cuando se ta tratando de vivir en dalgún otru momentu en vez de vivir l'agora. Se ta comparando, planiando o tentando de caltener una ilusión de control metanes una realidá que ta dafechu más allá del control.”

Notes[editar | editar la fonte]

  1. Práutica d'alimentación meditativa d'orixe budista, consistente en concentrase totalmente nos movimientos que s’empleguen al xintar y nos elementos y preseos de la xinta.
  2. Arte xaponés de la caligrafía, de raigaños chinos y influencies Zen.

Ver tamién[editar | editar la fonte]