Mushin

De Uiquipedia
Saltar a: navegación, buscar

Mushin (無心; chinu wúxīn: "non-mente") ye un estáu mental nel que se diz qu’entren los artistes marciales perhabilidaos cuando combaten. Estos espertos tamién prautiquen tal estáu mental nes actividaes de diario. El términu ye una simplificación de mushin no shin (無心の心), una espresión Zen que significa mente de la non mente y que tamién se conoz como l’estáu de la "non-mente". Ello ye, una mente non fixada o ocupada por pensamientu o emoción dalos y, poro, abierta a too.

Nel combate o na vida diaria algámase mushin cuando la mente d’una persona ta llibre de pensamientos d’anoxu, mieu o egoísmu. Esiste una ausencia de pensamientu o xuiciu discursivos, polo que la persona ye llibre dafechu p’actuar y reaicionar escontra un adversariu ensin dulda y ensin alteración causada por esos pensamientos. Nesti puntu una persona nun s’enfota no que “piensa” que tien que ser el siguiente movimientu, sinón na so reaición natural entrenada o no que “siente” intuitivamente

Pero nun se trata d’un estáu de relaxación cercanu al sueñu. Pue dicise que la mente trabaya a una velocidá peralta, pero ensin intenciones, planes o direición. Faise una analoxía ente una mente clara y un banzáu sele, que ye a espeyar claramente la lluna y los árboles. Pero neto que les ondes nel banzáu deformen la semeya de la realidá, asina los pensamientos qu’atrapamos deformen la verdadera perceición de la realidá.

Un artista marcial tendrá de xuru qu’entrenar munchos años pa ser quien a caltener mushin. Dará-y tiempu a prauticar de forma repetitiva los movimientos y intercambios de téuniques milenta vegaes, hasta que pueda facelos espontáneamente, ensin pensamientu consciente, cambiando asina les reaiciones naturales pa que seyan más efeutives en combate o ondequiera que se faigan. Ensin embargu, si’l prauticante ye quien a atender sinceramente al so profesor, podrá algamar esti nivel en solo unos pocos años.

Dalgunos maestros creyen que mushin ye l’estáu en qu’una persona finalmente pescancia la inutilidá de les téuniques y llega a poder movese con verdadera llibertá. En realidá tales persones yá nun se consideren más a sí meses como “lluchadores”, sinón como simples seres vivientes que se mueven pel espaciu.

El llexendariu maestru Zen, Takuan Soho, dixo:[1]

La mente tien que tar siempre nel estáu de “fluyir”, porque cuando se detién ayures eso significa que’l fluxu s’interrumpe, y esta interrupción ye perxudicial pal bienestar de la mente. Nel casu del espadachín, significa la muerte. Cuando’l espadachín ta pa enfrentase al so adversariu, nun tien que pensar nel adversariu, nin en sí mesmu, nin nos movimientos de la espada del enemigu. Ta allí namái, cola so espada que, escaecida de toa téunica, ta preparada ensembre pa siguir los dictaos del subconsciente. L’home escártase a sí mesmu como’l que manexa la espada. Cuando golpia, nun ye l’home’l que golpia sinón la espada na mano del subconsciente del home.

Sicasí mushin nun ye namái un estáu de mente que pue consiguise nel combate. Munchos artistes marciales, sobre too los que prautiquen artes marciales xaponeses como Kárate o Iaijutsu, entrenen pa consiguir esti estáu de mente nos kates, pa lo hai qu’executar los movimientos a la perfeición —que puedan consiguise nel combate o en cualquier otru momentu—. Una vez consiguíu mushin per aciu de la práutica o estudiu de les artes marciales (anque pue consiguise per aciu d’otres artes o práutiques que refinen la mente y el cuerpu), l’oxetivu ye entós algamar el mesmu nivel de completa conciencia n’otros aspeutos de la vida del prauticante.

L’estáu de mushin ta mui bien cerca d’otru estáu de mente conocíu como heijoshin (“mente cotidiana”)[2], que supón llograr un equilibriu y harmonía completos na vida d’ún a traviés de la disciplina mental. Miyamoto Musashi, el gran espadachín, escribió daqué sobre estos estaos mentales, y les sos espiriques con Jotaro mentáronse de cutiu nel folclor xaponés como lleiciones qu’hai que deprender pa la práutica de la vida d’ún. Mushin y heijoshin tán enforma rellacionaos coles enseñances del Budismu, concretamente les enseñances Zen, y efeutivamente mui bien d’aspeutos y atributos mentales básense en gran midida nestes filosofíes.

Referencies[editar | editar la fonte]

  1. Soho, Takuan. The Unfettered Mind. Trans. William Scott Wilson. Tokyo: Kodansha International Ltd., 1986.
  2. Kiyota, Minoru. Kendo, Its Philosophy History and Means to Personal Growth. Kegan Paul International, 1995, p.13.

Ver tamién[editar | editar la fonte]