Rudolf Hess

De Uiquipedia
Saltar a: navegación, buscar
Rudolf Hess

Rudolf Hess o Heß (26 d'abril de 1894, Alexandría, Exiptu - 17 d'agostu de 1987, Berlín, Alemaña) foi un políticu alemán, figura clave de l'Alemaña nazi.

Al entamar la Primera Guerra Mundial taba a puntu d'ingresar na Universidá d'Oxford, pero alistóse nel exércitu alemán como voluntariu del 7u batallón d'artillería bávaru, onde-y dieron la Cruz de Fierro por dos firíes, una d'elles grave nel pulmón izquierdu.

En 1919 conoció a Adolf Hitler nun mitín y un añu depués entró nel Partíu Nacionalsocialista Alemán del Trabayu (NSDAP n'aleman). Formó parte del Putsch de Múnich de 1923 y compartió celda con Haushofer y Hitler. Al postreru aidólu a escribir el llibru Mein Kampf (La mio llucha). En 1925 foi secretariu políticu de Hitler, entamando les sos actividaes polítiques.

Pa 1927 casó con Lise Pröhl. Cinco años depués nomáronlu Presidente del Comité Central Nazi y en 1933 salió elixíu parlamentariu del Reichstag. Cuando Hitler algamó'l poder dieron-y los cargos de cabezaleru del partíu nazi y Ministru d'Estáu, convirtiéndose nel segundu na xerarquía nazi.

En 1941 apresáronlu nel Reinu Xuníu nun viaxe qu'anguaño ta ensin aclariar. Paez ser que buscaba negociar colos británicos la paz pa que'l réximen nazi pudiera centrase n'atacar a la URSS, anque esta esplicación nun nunca la aceutó Hitler, que dixo que yera un llocu y un traidor.

Morrió na cárcele de Spandau a los 93 años, ensin volver a tar en llibertá dende que lu apresaren nel Reinu Xuníu.