Pelayo

De Uiquipedia
Saltar a: navegación, buscar
Pelayo
Príncipe de los Ástures
Pelagius of Asturias.jpg
Don Pelayo, según una illustración del sieglu XVIII.

718 - 737
Predecesor Primer monarca asturianu
Socesor Favila I (como Rei d'Asturies)

Nome real Pelayo
Nacencia ¿?
¿Asturies? (Ye la hipótesis más compartida, anque tradicionalmente la historiografía-y diera un orixe godu o otros)
Muerte 737
Cangues d'Onís, Asturies
Entierru Santa Cueva de Cuadonga
Socesor Favila I
Consorte Gaudiosa
Descendencia Favila I, rei d'Asturies, Ermesinda
Casa Real Dinastía Astur-Lleonesa
Padre Duque Favila
Madre ¿?

Pelayo o Pelayu (¿? - Cangues d'Onís, Asturies, 737) foi'l primer monarca del reinu d'Asturies que rixó hasta la so muerte. El so orixe ye controvertíu, anque se-y atribúin los oríxenes más variaos. La Crónica Albeldense conviértelu nún noble godu («XV. ITEM ORDO GOTORUM OBETENSIUM REGUM. 1. Primum in Asturias Pelagius rg. in Canicas an. XVIIII. Iste, ut supra diximus, a Uittizzanc rege de Toleto expulsus Asturias ingressus.[1]). El testamentu d'Alfonso III, del añu 869,[2] en que'l rei Magnu dona al presbíteru Sisnando la ilesia de Santa María de Tenciana (Tiñana, Siero) que so tíu Alfonso el Castu ganara de les propiedaes pertenecientes a so bisgüelu Pelayo, vincula territorialmente a Pelayo col área central d'Asturies, anque ensin aportar datos sobro'l so llugar d'orixe. Frenó la espansión de los musulmanes haza'l norte, comenzó la conquista cristiana y se lu considera tradicionalmente como'l fundador del reinu d'Asturies, anque investigaciones arqueolóxique recientes suxeren que podría tenelo fecho sobre una organización política llocal anterior.[3]

La lleenda[editar | editar la fonte]

Monumentu a Pelayo en Cuadonga

Según la lleenda, Pelayo yera un noble visigodu, fíu del duque Favila. Por cuenta de les intrigues ente la nobleza visigoda, el rei Witiza conspiró p'asesinar a so padre. Pelayo fuxó a Asturies, onde tenía amigos o familia. Darréu, al sentise inseguru na Península, coló como pelegrín a Xerusalén. Ellí permaneció hasta la muerte de Witiza y entronización de Rodrigo, del que yera partidariu. Con ésti, ocupó'l cargu de conde d'espatarios o de la guardia del rei y como talu combatió na batalla de Guadalete n'abril o mayu del añu 711. Tres la batalla abellugóse en Toledo y, a la cayida de la ciudá (714), mentes otros escapaben a Francia, elli volvió a Asturies, supuestamente custodiando l'ayalga del rei visigodu.

Les primeres incursiones árabes nel norte fueron les de Musa ibn Nusair (conocíu como Muza) ente los años 712 y 714. Entró n'Asturies pel puertu de Tarna, remontó'l ríu Nalón y tomó Lucus Asturum (Lugo) y dempués Xixón, onde dexó a cargu al gobernador Munuza. Les families dominantes del restu de les ciudaes asturianes capitularon y probablemente tamién la familia de Pelayo.

En 718 tuvo llugar una primera revuelta encabezada por Pelayo (al paecer porque Munuza casárase pola fuerza con so hermana Adosinda), que fracasó. Pelayo foi deteníu y unviáu a Córdoba. Sicasí, consiguió escapar y volver a Asturies, onde encabezó una segunda sublevación, refuxándose nos montes de Cuadonga y Cangues, onde se caltenía la resistencia.

En 722 Munuza unvió a un xeneral, Al Qama, a someter a los sublevaos. Al Qama empobinóse contra Bres (Piloña), onde s'atopaba Pelayo. Ésti marchó coles tropes hasta'l monte Auseva, nel valle de Cangues y ellí, na Batalla de Cuadonga, aniquiló al destacamentu d'Al Qama que venía de la península p'ayudar a sofocar definitivamente la resistencia nos montes cantábricos.

Tres la batalla, el gobernador militar al mandu de la metá norte de la península Ibérica, Munuza, que tenía como base Xixón, tentó escapar d'Asturies y algamar la seguranza de les sos posiciones na meseta, pero foi prindáu y executáu xunto col so séquitu y tropes nún valle del centru d'Asturies.


Pelayo
Wikimedia Commons tien archivos rellacionaos con:



Emblema del Reino de Asturias.svg Reinu d'Asturies (718-925)
Predecesor:
Nun hubo
Rei d'Asturies
718 - 737
Socesor:
Favila



Ver tamién[editar | editar la fonte]

Referencies[editar | editar la fonte]

  1. "LLISTA DE LOS REIS GODOS D'UVIÉU. 1. El primeru n'Asturies foi Pelayo. Reinó en Cangues 18 años. Ésti, como enantes diximos, llegó a Asturies espulsáu de Toledo pol rei Witiza." Crónica Albeldense (CSIC Institutu d'Historia).
  2. RISCO, Fr. Manuel, España Sagrada, tomo XXX-VII, Madrid, 1789
  3. Noticia en La Voz de Avilés