Newark

De Uiquipedia
Saltar a: navegación, buscar
Bandera de la ciudá
Llocalización de Newark dientro'l so condáu, y d'esti dientro l'estáu

Newark ye la ciudá más poblada del estáu estaunidense de Nueva Jersey, y centru alministrativu del condáu d'Essex. La ciudá, que ye ún de los mayores centros de distribución de tresporte marítimu, aéreu y ferroviariu del país, tenía en 2010 (U.S. Census Bureau) una población de 277.140 habitantes.

Asitiada a unos 13 km al oeste de Manhattan, nel centru de la conocida como New Jersey's Gateway Region, ye la segunda mayor ciudá de l'area metropolitana de Nueva York. El so puertu de contenedores, Port Newark, ye'l mayor de la costa atlántica de los Estaos Xuníos; y el so aeropuertu (Newark Liberty International Airoport) foi el primer aeropuertu comercial municipal del país, y ye anguaño ún de los de mayor tráficu de los Estaos Xuníos.

La ciudá acueye la sé de delles multinacionales, y tamién rescamplen delles de les sos universidaes (Rutgers–Newark, New Jersey Institute of Technology, Seton Hall University's Law School...) y edificios culturales (New Jersey Performing Arts Center) y deportivos (Bears & Eagles Riverfront Baseball Stadium). Divídese en cinco distritos, nos que conviven zones de paisaxe nidiamente urbanu con otros de calter periurbanu.

La ciudá foi fundada en 1666 por puritanos de Connecticut qu'aportaron, al mandu de Robert Treat, dende la colonia de New Haven. Nel sieglu XIX y entamos del XX la ciudá espoxigó enforma, lo mesmo no que cinca a la so población como al desarrollu de la so industria. Por embargu, na segunda metá del sieglu pasáu entamó'l so declive, con grandes tensiones raciales que llegaron al so cumal nos disturbios de 1967. De magar 1990 la ciudá ta recuperando la so vitalidá.

L'skyline de Newark pela nueche

Enllaces esternos[editar | editar la fonte]

N'inglés Páxina web oficial de la ciudá

Newark
Wikimedia Commons tien archivos rellacionaos con: