Nacionalismu andaluz

De Uiquipedia
Saltar a: navegación, buscar
Bandera nacionaliega andaluza

El nacionalismu andaluz ye un movimientu políticu y social que defende la reconocencia d'Andalucía como una nación dientro d'Europa.

Los cimeros partíos políticos que representen al nacionalismu ya l'independentismu andaluz son Partido Andalucista, Nación Andaluza (NA), Asamblea Nacional d'Andalucía (ANA). Tamién el Sindicatu d'Obreros del Campu (SOC), el Sindicato de Andalucía de Trabajadores (SAT) y el Bloque Andaluz d'Esquierdes (BAI), ansí como la organicazión de mocedá Jaleo!!!, organización dixebriega y socialista.

Hestoria del nacionalismu andaluz[editar | editar la fonte]

La hestoria del nacionalismu andaluz entama nel sieglu XIX. Demientres el reináu de Sabela II yá xurdiera n'Andalucía un fuerte movimientu anarquista, idega que vieno conxunta a un sentimientu rexonal fonderu que finó por evolucionar y dar llugar al nacionalismu andaluz.

Foi tres la Revolución Gloriosa, en 1873, cuando'l movimientu andalucista emprimó a tomar fuercia nes provincies occidentales d'Andalucía. Demientres la I República proclamáronse independientes una bayura cantones d'Andalucía y creóse n'Antequera una Constitución en 1883 que proclamaba un estáu dixebráu d'Andalucía como una República cantonal, pero qu'enxamás nun foi reconocíu. A esta Constitución se la conoz como la Constitución Federal d'Antequera de 1883.

Foi en 1918 cuando tornaría a alzase na Asamblea de Ronda, aú yá apaez Blas Infante, nomáu pol Parllamentu Andaluz nel entamu del Estatutu d'Autonomía mediantes decretu (D.S.P.A. n 24, de 14 d'abril de 1983) Pá de la "Patria Andaluza". Ye nesta asamblea aú se creyen la bandera d'Andalucía y el so escudu.

Na II República'l nacionalismu andaluz, de la mano de Blas Infante, algama redautar un estatutu d'autonomía p'Andalucía, pero nun llegaríe a aprebase por mor del españíu de la Guerra Civil tres la sublevación millitar de 1936. Demientres la guerra y el franquismu, munchos andalucistes foron fusilaos (como Blas Infante) o s'esiliaron.

Nun sedríe fasta 1973 cuando rexursiría'l nacionalismu andaluz de mano d'Alejandro Rojas Marcos, fundador del Partíu Socialista d'Andalucía, que más sero pasará denomase Partíu Andalucista.

El 4 d'avientu de 1977 unos dos millones de persones xurden a les cais per toa Andalucía pidiendo l'autonomía, convocaos por tolos partíos políticos sacantes la Xunión de Centru Democráticu. Tres el referéndum del 28 de febreru de 1980, s'apreba l'estatutu d'autonomía.

Anguaño, el nacionalismu andaluz tien como enseña más carauterística la bandera nacionalista andaluza, que ye la bandera d'Andalucía con una estrella de cinco puntes collorada nel centru, anque hai otres banderes nacionaliegues, esta ye la más conocida ya emplegada polos nacionaliegos.

Ver tamién[editar | editar la fonte]

Enllaces esternos[editar | editar la fonte]