Mapa

De Uiquipedia
Saltar a: navegación, buscar
Mapa de la Tabula Roxeriana añu 1456 edC

Un mapa (dalgunes vegaes nomáu carta, de cartografía) ye una representación gráfica y métrica d'una faza de territoriu sobro una superficie bidimensional, xeneralmente plana, pero qu'arriendes pue ser esférica, como ocurre nos globos terráqueos. Que'l mapa tenga propiedaes métriques, quier dicir que tien de ser dable tomar midides de distancies, ángulos o superficies sobro él y obtener un resultáu aprosimadamente esautu. A la ciencia y téunica que fai los mapes denómase-y cartografía.

Entamaos pol home col envís de coñocer el mundu, y sofitaos primero en teoríes filosófiques, los mapes constitúin una fonte d'información enforma valoratible, y una gran parte de l'actividá humana, tá rellacionao d'ún u otru mou cola cartografía.

Anguaño tiense l'enfotu y la ronía de siguir cola enxamás bilada xera cartográfica. L'Universu en xeneral y el Sistema Solar no particular, ufren ensin dubia nueves llendes pa esti llabor que tien oríxenes escaecíos na memoria.

L'usu de les téuniques sofitaes na fotografía por satélite, fizo dable non sólo poder coñocer les llendes esautes d'un país, d'un continente o del mundu, sinoN tamién aspeutos etnolóxicos, hestóricos, estadísticos, hidrográficos, orográficos, xeomorfolóxicos, xeolóxicos y económicos, qu'empobinen al home a un conocimientu más anchu del mediu y del planeta nel que vive.

Mapa antigu (apro. 1650) representando a California como una islla.

La Hestoria de la Cartografía abarca dende les primeres trazes nel sable, hasta l'usu de les téuniques xeodésiques, fotogramétriques y de fotointerpretación . Los errores xeométricos d'un mapa suelen caltenese per baxo de lo que'l güeyu humanu columbra. El llímite de la perceición visual humana tá en 0,2 mm.

L'ensundia na ellaboración d'un mapa, ye que lo representao nél tien de ser nidio, ensin sacrificar por ello la precisión. El mapa, ye un documentu que tien de ser atalantáu según les idees qu'intervienen nel so aviamientu. Tou mapa tien un orde xerárquicu de valires y los primarios tienen de solliñase énte los secundarios.

Pa poder cumplir con toes estes desixencies, el cartógrafu tien de criar dellos "planos de llectura". En tou momentu tien de tener presentes les téuniques de simplificación, per duana de colores o simboloxía, ensin escaecer que nún planu de llectura más fondera pueden obtenese elementos informativos detallaos. La cantidá d'información, tien de tar rellacionao de mena proporcinal a la escala. Cuanto mayor seya l'espaciu destináu a una rexón, mayor sedrá el númberu d'elementos informativos que se puedan ufrir sobro ellos.

De fincia, tou mapa tien d'incluyir una síntesis de conxuntu, lo mesmo qu'un detái analíticu que permita una llectura más fondera. El nivel nel que se cumplan estes dos condiciones, determina, a la fin, la calidá del mapa.