L. L. Zamenhof

De Uiquipedia
Saltar a: navegación, buscar
Ludwik Zamenhof

Lázaro Zamenhof (Białystok, Polonia, 15 d'avientu de 1859Varsovia, Polonia, 14 d'abril de 1917) foi un ópticu xudíu d'orixe polacu que lluchó pol entendimientu y averamientu ente los pueblos del mundu al traviés de la comunicación. Pa ello, Zamenhof creo una llingua nueva: l'esperanto. Los ideales de fraternidá de Zamenhof y la simplicidá gramatical del esperantu fixeron que'l movimientu esperantista nun dexara de medrar hasta los nuesos díes.

Zamenhof vio, gracies a la diversidá cultural de la so ciudá d’orixe, Bialystok, que les diferencies ente los pueblos a causa de la diversidá de llingües y relixones yera causante de conflictos. Asina qu’entamó a trabayar nun idioma fácil d’aprender p’afalar la comunicación ente pueblos y que sirviera como idioma auxiliar internacional, ensin desaniciar los idiomes naturales.

Nuna década, Zamenhof iguó un vocabulariu formáu por raíces de llingües modernes d’orixe indoeuropéu, amás del llatín y el griegu clásicu, una gramática de 16 regles ensin esceiciones y un alfabetu fonéticu.

L’entamu del movimientu esperantista foi en 1887, cuando Zamenhof espubliza “La Lingvo internatia” (La llingua internacional), que más tarde foi nomáu “Unua Libro” (Primer llibru). L’autor espublizó esti llibru col nomatu de Doktoro Esperanto (Doctor Esperanzáu), nome col que más tarde sería conocida la llingua

Foi esparciendo les sos idees con dineru del so petu, colo qu’acabó na ruina, hasta qu’en 1905 celébrase en Francia’l primer Congresu Universal d’Esperantu, onde s’afita’l movimientu y aprueben el “Fundamentu del Esperantu”, que recueye les bases intocables del idioma.

Zamenhof morrió en Varsovia en 1917. Los sos tres fíos (Adam, Sofía y Lidia) perecieron mientres la Segunda Guerra Mundial a causa del Holocaustu, yá que foron clasificaos como "Juden" (xudíos) baxo les lleis raciales.

Homaranismu[editar | editar la fonte]

Otru de los grandes proyectos de Zamenhof foi l'homaranismu (n'esperantu significa "la ideoloxía de los miembros de la humanidá"), una especie de moral suprarrelixosa basada na ausencia de prexuicios y nel conocíu "Trata a los demás como a ti te prestaría que te tratasen" que se podría interpretar como un humanismu.