Flavio Rodríguez Benito

Flavio Rodríguez Benito
Vida
Nacimientu	Uviéu, 1971 (52/53 años)
Nacionalidá	España
Estudios
Llingües falaes	castellanu
Oficiu	músicu

Flavio Rodríguez Benito (1971, Uviéu) Ye maestru gaiteru acreditáu pol Gobiernu del Principáu d'Asturies dende 1991 y profesor de flauta travesera, diplomáu pol Conservatoriu de Música de la Mancomunidá del Nalón.

Persona de gran inquietú cultural y abondu dinamismu, formó y dirixó la Banda de Gaites Xaranzana d'Uviéu ente los años 1988 y 1998, al tiempu que yera miembru de los grupos d'invesgación etnográfica Urogallos y L'Andecha Folclor d'Uviéu, participando nel equipu de trescripción de la música del so archivu y na grabación de varios discos.

Foi profersor de gaita en varios conceyos d'Asturies (Cangas del Narcea, Carreño, Gozón, Piloña, Riosa y Uviéu), ya impartió cursos en dellos Centros Asturianos de tol mundu (Buenos Aires, L'Habana, Lausane, Santiago de Chile, Xinebra y Zaragoza).

Secretariu del CGA (Conceyu de Gaiteros Asturianos) ente los años 1991 y 1993, asina como profesor de gaita y direutor de la Banda de Gaites de l'Asociación Cultural Xana de Perlora (Carreño), ente los años 1995 y 1997, colos que participó na grabación de varios discos. Ente los años 1992 y 1997 perteneció al grupu de música folk Llan de Cubel, col que realizó xires per tol mundu y grabó los discos L'otru llau de la mar y Llan de Cubel IV. Secretariu d'AEMMDAS (Asociación d'Escueles Municipales de Música y Danza d'Asturies) ente los años 2000 y 2003.

Nel añu 2002 presentó'l Cursu de gaita asturiana en CD-ROM (Ediciones Trabe) y el so primer discu en solitariu Mara (Fonofolk).

Anguaño ye profesor de la Escuela d'Asturianía, muérganu dependiente del Conseyu de Comunidades Asturianes del Principáu d'Asturies, dende 2001.

En 2003 compunxo, por encargu del grupu de teatru Pausa, la banda sonora pa la obra d'Alejandro Casona La dama del alba cola qu'afaya'l Premiu Asturies de Teatru, dau pol Gobiernu del Principáu d'Asturies. Amás collaboró na grabación de los discos Revolución Celta, del grupu de múscia folk de Buenos Aires, Fardaxu, y Tocándar, del grupu de percusión portuguesa, Tocándar.

Esi mesmu añu participó nel espectáculu de música y poesía sofitáu pola Conseyería de Cultura del Principáu d'Asturies, xunto colos escritores asturianos Berta Piñán y Xuan Bello, na esposición de les llingues Expolingua de París y nel Festival Intercélticu de Lorient.

Anguaño ye direutor de la Banda de Gaites La Raitana de Nava y Piloña, cola qu'a finales de 2002 presentó'l CD De la revuelta a la marea (Fonoastur), y profesor de gaita y direutor de la Escuela Municipal de Música de Nava.

Referencies[editar | editar la fonte]

Enllaces esternos[editar | editar la fonte]