Desmond Dekker

De Uiquipedia
Saltar a: navegación, buscar
Desmond Dekker

Desmond Dekker (16 de xunetu de 1941 - 25 de mayu de 2006), yera un cantante y compositor de ska y reggae.

El cantante, del que'l verdaderu nome yera Desmond Adolphus Dacres, nació en Kingston (Xamaica) y quedó güérfanu na adolescencia. Foi'l primer gran astru del pop xamaicanu, cuando los nomes de Bob Marley o Jimmy Cliff tovía nun yeren conocíos.

Los primeros ésitos menores llegáron-y a mediaos de los años 60 na so tierra caribeña. Al entamu de la so carrera, la so música yera sincera y correcta. Foi a lo llargo de los años 60 cuando se tornó más políticu, treslladóse a Inglaterra y collechó allí el so primer ésitu cola canción inspirada en James Bond 007 (Shanty Town), y qu'algamó gran sonadía ente los rude boys (mozos xamaicanos de los ghettos dedicaos a la delincuencia y a semar el terror).

La fama a nivel internacional llegó-y en 1969 con The Israelites, un cantar que fala de la rellación ente la probitú y la violencia. Tanto en Gran Bretaña como en muchos otros países llogró asína asitiase nel númberu ún de les llistes. Foi el primer intérprete xamaicanu en metese nel mercáu estaunidense con música auténticamente xamaicana.

Desmond Dekker morrió d'un ataque al corazón el 25 de mayu de 2006, nel so llar de Surrey, Inglaterra, a la edá de 64 años. Dekker yera divorciáu y tenía un fíu y una fía.

Enllaces externos[editar | editar la fonte]