Císter

De Uiquipedia
Saltar a: navegación, buscar
Escudu heráldicu cisterciense.

La Orde del Císter (en llatín: Ordo Cisterciensis, O.Cist) , conocida como el Císter, ye una orde relixosa fundada por Roberto de Molesmes en 1098. Debe'l so nome a l'Abadía de Císter na qu'entamó la historia de la Orde (la antigua Cistercium romana, localidá averada a Dijon, Francia).

Recibieron na Edá Media el nome de monxos blancos, pol color del so hábitu, n'oposición a los monxos negros, que yeren los benedictinos. Tamién ye frecuente la denominación monxos bernardos o simplemente bernardos pol puxu que-y dio a la orde Bernard de Clairvaux (1090-1153), home d'una personalidá y d'un carisma excepcionales. El so resplandiu y el so prestixu personal ficiéronlu'l cisterciense de mayor sonadía del sieglu XII. Si nun foi el fundador de la orde, convirtióse nel so maestru espiritual.

Historia[editar | editar la fonte]

Brazu y blagu típicu cisterciense en llábana d'Abá en Abadía de Boyle (Irlanda).

Siendo Roberto abá del monesteriu cluniacense de Molesmes, él y un grupu de monxos de la so comunidá propuséronse retornar a la observancia estricta de la primitiva regla de san Benito de Nursia, qu'en 540 fundara la Orde de San Benito. Pa ello erixó una nueva abadía en Císter, onde los monxos blancos dedicaron la so vida al trabayu manual y a la contemplación ascética con igual empeñu, poniendo en práctica el lema benedictín Ora et labora (reza y trabaya). El so sucesor, san Alberico, obtuvo en 1100 el reconocimientu de la nueva orde por parte del papa Pascual II qu'otorgó al monesteriu el “privilexu romanu”, lo qu'equivalía a ponelu baxo la protección de la Santa Sede; pero sólo foi'l tercer abá, san Esteban Harding, el qu'en 1119 dotó al Císter d'una regla propia, la Carta de Caridá, na que s'establecíen les normes comunitaries de total probitú, obediencia a los obispos, dedicación al cultu divín con dexación de les ciencies profanes, y demás estatutos de la orde. En 1113 ingresa como noviciu Bernardo de Fontaine xunto con un garrapiellu de familiares y amigos aconceyaos en Châtillon. Cuando dos años depués l'abá Esteban decide esparder l'ámbitu monásticu con nueves fundaciones, erixendo los cenobios de La Ferté, Pontigny, Morimond y Claraval (Champaña), envió a esti últimu a Bernardo y los sos allegaos, en parte poles dotes que'l nuevu monxu manifestaba pa la dirección d'una abadía como la que-y encomendaba, y en gran parte tamién pa llibrar a Cîteaux de la escesiva presencia del “clan” de los Fontaine.