Russula aurea

De Wikipedia

Russula aurea, o rúsula dorada, ye un hongu basidiomiceto comestible, de la familia Russulaceae.[1][2] Crez en montes de coníferes, caducifolios o mistos, y ye bien frecuente nel área mediterránea. La so cogorda, o cuerpu granible, apruz dende principios de branu hasta principios de seronda. L'epítetu específicu, aurea, significa "dorada".[1]

Descripción[editar | editar la fonte]

La so cogorda presenta un sombrerucu d'ente 6 y 9 centímetros de diámetru, hemisféricu n'exemplares nuevos, que darréu toma forma esplanada y que finalmente queda ablayáu nel centru y acanalada nel cantu. La cutícula ye mafosa n'ambientes húmedos y xebrable de la carne con relativa facilidá nes zones cercanes a los márxenes. Presenta  un color anaranxáu, doráu o acoloratáu y una testura daqué rugosa. Les llámines miden ente 6 y 12 milímetros d'anchu, y son apertaes y ventrudes, encruciándose na zona cercana al pie. Son de color crema con arestes de color mariellu cromu. El pie algama ente 6 y 9 centímetros de llargor y ente 2 y 2,5 d'anchu, y ye buecu, rugoso, estriáu y de color blancu amarellentáu, daqué más escuru na zona más cercana al sustratu. La carne ye compacta en cogordes nueves y blanda y fráxil n'exemplares maduros, de sabor prestoso y arume poco marcada. Ye blanca, de color amarellentáu na zona más cercana a la cutícula. La esporada ye mariella.[1]

Referencies[editar | editar la fonte]

  1. 1,0 1,1 1,2 Grünert, H.; Grünert, R.; VV.AA. (1984). Guías de Naturaleza Blume: Setas (t. original:"Pilze"). Barcelona: Blume, páx. 164. ISBN 84-87535-11-9.
  2. «Russula aurea».