Ramón Fernández Reguero

Ramón Fernández Reguero
Vida
Nacimientu	Serantes, 1775
Nacionalidá	España
Muerte	1840 (64/65 años)
Estudios
Llingües falaes	castellanu
Oficiu	inventor

Ramón Fernández Reguero (1775, Serantes – 1840) foi un científicu, agronomista ya inventor asturianu.

Biografía[editar | editar la fonte]

Fernández Reguero nació'l 27 d'agostu de 1775, nel llugar de Xarén, na parroquia asturiana de Serantes, perteneciente entós al conceyu de Castropol. Cursó matemátiques na Real Academia de San Carlos de Valencia, y llogró'l títulu de Topógrafu na de San Fernando de Madrid. En 1810 formó parte como vocal de la Xunta Patriótica del Partíu de Castropol, que lluchaba contra la invasión napoleónica, ya instalándose por cuenta de la guerra na Vega de Ribadeo (anguaño A Veiga) la Fábrica d'Armes d'Asturies, Fernández Reguero inventó un carru de fueu de muncha ventaya non yá contra la Infantería sinón contra la Caballería enemiga, que los sos usos y ventayes fixo demostrables; y yá que darréu antes dizse qu'escurriera tamién el métodu de conducir nos carros del país los cañones de campaña, en tal contestu esi carru de fueu namái puede entendese como un vehículu militar movíu por máquina de vapor.

En 1811 volvió a entamar les enseñances del Seminariu d'Educación del Partíu de Castropol na Vega de Ribadeo, fundáu y dotáu en 1726 pol obispu d'Osma Jacinto Valledor, y Fernández Reguero foi nomáu'l so direutor y catedráticu d'agricultura, exerciendo mientres años un impresionante llabor académicu y téunica, siendo l'auténtica alma de la institución. Ente otres coses bien notables en 1836 inventó -nel más ampliu sentíu de la pallabra, ye dicir proyeutó, diseñó, construyó y fixo funcionar ante una comisión téunica de la que formaba parte'l célebre Guillermo Schulz- un vehículu pa llabores agrícoles propulsado por máquina de vapor.

Estos dos invenciones constitúin ensin dulda importantes finxos de la Hestoria de la teunoloxía n'España, y tamién ensin dala dulda de les hestories universales de la maquinaria agrícola y de los vehículos militares. Fernández Reguero foi pos un induldable precursor del carru de combate y del tractor agrícola.

L'amplitú de les moliciones de Fernández Reguero ta ilustrada pol polifacéticu títulu d'una de les sos obres fundamentales, publicada en Lugo en 1837: Colección de ideas ó apuntes relativos a prácticas electorales, influjo político de las disensiones locales, sistema legal de reemplazo del ejército de mar y tierra, enseñanza agraria aplicada, protección del trabajo de los agentes agrónomos y su estabilidad local, memorias y cartillas agrarias, descripción de aperos, máquinas, e instrumentos aplicados a la agricultura, minería, acarreo, geodesia, topografía, etc. etc. etc..

Finalmente, como muestra de la so honradez intelectual, recoyamos esta preciosa confesión so: A pesar de que conozo toles ventayes y entá necesidá d'esta división [la de les provincies d'Uviéu y Lugo "pola sierra del Palu que dende Degaña termina nel océanu nes llendes del conceyu de Navia y Valdés" nun soi capaz de solicitala y sostenela pola esmolición d'asturianu, debilidá que nun m'atrevo a vencer por más que sía humillante y antifilosófica.

La Sociedá asturgalaica d'amigos del país, con sede en Castropol, reeditó en 2006 una de les obres claves de Fernández Reguero, el so Aplicación del vapor al tresporte xeneral sobre caminos comunes.

Bibliografía[editar | editar la fonte]

Cancio-Donlebún Ballvé, Javier. Casa del Campu de Tapia. (Incluyíu en: FERNÁNDEZ MÉNDEZ, Diego y LÓPEZ PÉREZ, Camilo. Hestoria de Tapia al traviés de les sos cais (T. II). Uviéu 2001. ISBN 84-8459-066-6)
Cotarelo Valledor, Armando. El seminariu d'educación de la Vega de Ribadeo, güei A Veiga. Madrid 1950
López-Cotarelo Villaamil, Antonio y Lino. En redol a la parroquia de Serantes (Incluyíu en: FERNÁNDEZ MÉNDEZ, Diego y LÓPEZ PÉREZ, Camilo. Hestoria de Tapia al traviés de les sos cais (T. III). Uviéu 2005. ISBN 84-8459-394-0)

Referencies[editar | editar la fonte]

↑ ^1,0 ^1,1 URL de la referencia: https://www.dmg-lib.org/dmglib/handler?biogr=20628004. Apaez como: Ramón Fernández Reguero.

Enllaces esternos[editar | editar la fonte]

[594079766d4624d3d117cd69151cf1c0500171b2-1] 1,0 ^1,1 URL de la referencia: https://www.dmg-lib.org/dmglib/handler?biogr=20628004. Apaez como: Ramón Fernández Reguero.

[1]