Radio Sele
Radio Sele ye una emisora de radio d'Asturies qu'emite n'asturianu dende Uviéu. Ye la única qu'emite nesta llingua dafechu y pue sintonizase nel 106.1 de la FM y pue sentise en direutu pel internet dende la so páxina web.
Vien emitiendo dende febreru de 1986 dende Uviéu. En 1999 diéron-y llicencia comercial baxo'l gobiernu autonómicu presidío por Sergio Marqués colo que pudo ampliar la so cobertura, anque un par d'años dempués, tres de que Vicente Álvarez Areces algamara la presidencia asturiana, quitó-yosla acordies con un recursu empobináu por otra empresa asturiana. Anguaño, la frecuencia concedía nun principio a Radio Sele ye emplegada pola cadena Punto Radio. Dende entós, la asociación que xestiona Radio Sele ta desenvolviendo delles aiciones xudiciales pa recuperala, con una sentencia favoratible yá asoleyada.
Anguaño emítense en direutu una ventena programes, aunque hai una programación musical hasta completar les 24 hores del día. La so emisora cubre un área del centru Asturies con una audiencia potencial de 800.000 persones.
En setiembre de 2006, y énte l'iniciu d'emisiones de la canal pública autonómica RPA, Radio Sele tuvo que cambiar la so frecuencia d'emisión del 106.5 habitual hasta entós, pol 106.1, ya que la nueva emisora, qu'ocupa el 106.4 del dial con enforma más potencia d'emisión, tapecía la so señal.
Referencies[editar | editar la fonte]
Enllaces esternos[editar | editar la fonte]
| Control d'autoridaes |
|
|---|
Datos: Q660212