Ríu Ucayali

De Wikipedia
Saltar a navegación Saltar a la gueta
Ríu Ucayali
Llocalización alministrativa
División cantu Rexón Ucayali
cantu Rexón Huánuco
cantu Rexón Loreto
Xeografía
Mapamapes
Ucayalirivermap.png
Rio Apurímac.png

El ríu Ucayali ye unu de los principales ríos del Perú, xuniéndose col ríu Marañón y, forma'l ríu Amazones. El ríu Ucayali escurre pola aguada oriental de los Andes peruanos, na parte central del país. Tien un llargor de 1771 km,[1] anque considerando les sos fontes más alloñaes (Tambo, Ene y Apurímac) algama los 2801 km.

El ríu da nome a la rexón Ucayali.

Xeografía[editar | editar la fonte]

Puerto Atalaya, na nacencia del Ucayali (confluencia Tambo y Urubamaba).
Parte de la plaza Grau, na ciudá portuaria de Pucallpa, la ciudá más importante a veres del Ucayali.
Barcu de carga nel ríu Ucayali cerca de les ciudaes de Requena pel sur y Nauta pel norte.

El ríu Ucayali naz nel departamentu de Ucayali, na confluencia del ríu Tambo (159 km) y el ríu Urubamba (862 km), na aguada oriental andina. Flúi en nidia rimada escontra'l norte del país hasta xuntase col ríu Marañón, dando dambos nominalmente orixe al ríu Amazones.

El Ucayali considérase anguaño la cabecera principal del ríu Amazones. Tien 1771 km de llargor, de los qu'el 80% son navegables por embarcaciones d'hasta trés mil tonelaes, pero coles sos fontes algama un llargor total de 2 801 kilómetros, dende la fonte del Apurímac, nel neváu Mismi, hasta la confluencia del Ucayali y el Marañón:

Los afluentes más importantes son el ríu Cohenga, el ríu Tahuania, el ríu Sheshea, el ríu Tamaya (310 km), el ríu Tapiche (448 km), el ríu Pachitea (393 km) y el ríu Aguaytía (379 km).

Los sos principales puertos tán nes ciudaes de Puerto Atalaya, xusto na so nacencia (confluencia Tambo y Urubamaba, con más de 10 000 habitantes en 2005), Pucallpa (la capital del departamentu de Ucayali y de la provincia de Coronel Portiellu, que cuntaba con más de 150 000 hab. en 2007), Contamana (17 000 hab.) y Requena, na desaguada del Tapiche.

La corriente cuerre 5-6 km/h y siempres puede atopase una canal de 20 a 50 m d'anchu con una fondura mínima de 1,5 m. Hai cinco malos pasos, por cuenta de la acumuladura d'árboles y balses de madera. Dacuando cayen roques enormes de los montes y deposítense nel calce, provocando grandes remolinos. El so anchor varia ente los 400-1200 m, por cuenta de la gran cantidá d'islles.

Nel ríu Ucayali atópase'l delfín de l'Amazones, la llondra xigante y el manatí amazónicu, que son más abondosos nel tramu de la Reserva Nacional Pacaya Samiria (20.800 km²). Ye una amplia zona protexida dende 1982, agües enriba de Nauta, d'una zona de la Amazonía inundable (ecosistema conocíu como várzea), la más estensa del Suramérica, y que por cuenta de ello foi designada sitiu RAMSAR en 1986.


Historia[editar | editar la fonte]

El ríu Ucayali llamóse primero San Miguel y de siguío Ucayali, Ucayare, Poru, Apu-Poru, Cocama y ríu de Cuzco. Perú realizó munches espediciones, costoses y hábilmente realizaes, de reconocencia de la rexón del Ucayali. Una d'elles (1867) afirmó que llograría algamar un puntu a unos 380 kilómetros de Lima, y el pequenu vapor Napo llogró abrir camín poles violentes corrientes hasta 124 km agües enriba de la confluencia col ríu Pachitea, hasta'l ríu Tambo, a 1240 km de la confluencia del Ucayali cola Amazones. El Napo llogró depués remontar la caña del Urubamba 56 km agües enriba de la so unión col Tambo, hasta un puntu a unos 320 kilómetros al norte del Cuzco.

El restu del Urubamba, como foi amosáu por Bosquet en 1806 y Castelnau en 1846, taba atayáu por cascaes, petones y una tremera d'otres torgues pal saléu. Torres, quien esquizó l'Altu Ucayali pal gobiernu peruanu, dio un llargor de 299 km, a cuntar dende la desaguada del Pachitea hasta l'encruz de los ríos Tambo y Urubamba.

Ver tamién[editar | editar la fonte]

Referencies[editar | editar la fonte]

  1. Los datos del llargor del ríu y de los sos afluentes vienen de la publicación Perú: Compendiu Estadísticu 2001, del Sistema nacional d'Estadística (SNE). Disponible nel epígrafe: 1.7 LLARGOR AVERÁU DE LOS RÍOS MÁS IMPORTANTES.

Enllaces esternos[editar | editar la fonte]

Ríu Ucayali