Prisma (óptica)

De Wikipedia
Saltar a navegación Saltar a la gueta

N'óptica, un prisma ye un oxetu capaz de refractar, reflexar y descomponer na lluz nos colores del arcu la vieya. Estos oxetos avecen a tener la forma d'un prisma triangular, y ye d'ehí d'aú-yos vien en nome. En xeometría, un prisma ye un poliedru llimitáu por dos polígonos iguales y paralelos, nomaos bases, y varios paralelogramos nomaos cares llaterales.

Descomposición de la lluz al travesar un prisma.

Llei de Snell en prismes[editar | editar la fonte]

Acordies cola llei de Snell, cuando la lluz pasa del aire al vidru del prisma amenorga la so velocidá, y la so trayeutoria esvíase formando un ángulu con respectu a la interfase. Como consecuencia d'ello la lluz refléxase o refráctase. L'ángulu d'incidencia del rayu de lluz y los índices de refracción del prisma y l'aire determinen la cantidá de lluz que sedrá reflexada y la que sedrá refractada, o tamién si va pasar esclusivamente una de les dos coses.

Tipos de prismes[editar | editar la fonte]

Prismes dispersivos[editar | editar la fonte]

Los prismes dispersivos úsense pa romper la lluz nos sos collores espectrales constituyentes. Llógrenlo porque l'índiz de refracción depende de la frecuencia: la lluz blanco qu'entra nel prisma ye un amiestu de diferentes frecuencies, caúna de les cuales dóblase de forma llixeramente distinta. Asina, la lluz azul enllentece'l so pasu más que la roxa, y asina doblase más qu'ella. Ente los tipos de prismes dispersivos tenemos, ente más otros, el prisma triangular, el prisma d'Abbe, el prisma de Pellin-Broca, el prisma d'Amici y el prisma compuestu.

Reflexión total de la lluz nún prisma de Porro.

Prismes reflectivos[editar | editar la fonte]

Los prismes reflectivos úsense pa reflexar la lluz col oxetivu de voltear, invertir, rotar, esviar o desplazar el rayu de lluz. Un usu típicu d'ellos ye la de voltear la imaxe, qu'ensin los prismes veríemos al traviés d'ellos cabeza abaxu, nos prismáticos y nes cámares fotográfiques reflex de llente única. Munchos prismes reflectivos usen una reflexión interna total p'algamar una alta reflexividá. Los más comunes son el prisma de Porro, el prisma de Porro-Abbe, el prisma de techu d'Amici, el pentaprisma, el pentaprisma de techu, el prisma d'Abbe-Koenig, el prisma de Schmidt-Pechan, el prisma de Bauernfeind, el prisma de Dobe y el prisma retroreflector.

Hai, tamién, dellos prismes reflectivos que son utilizaos pa dixebrar un rayu en dos o más. Son el prisma dicroicu y el cubu dixebrador de rayos.

Dispersión de la lluz por un prisma triangular.

Prismes polarizantes[editar | editar la fonte]

Los prismes polarizantes ruempen un rayu de lluz en componentes de polarización variable. Avecen a tar construyíos de material birrefrinxente cristalinu y son, ente más otros, el prisma de Nicol, el prisma de Wollaston, el prisma de Nomarski (una variante del anterior más afayaízu pal so usu en microscopía), el prisma de Rochon, el prisma de Sénarmont, el prisma de Glan-Foucault, el prima de Glan-Taylor y el prisma de Glan-Thompson.

Prismes deflectivos[editar | editar la fonte]

- Los prismes de cuña úsense pa esviar un rayu de lluz con un ángulu determináu. Si tenemos un par d'ellos podemos dirixir los rayos, rotándolos con ángulos determinaos, a cualisquier puntu que queramos d'un espaciu cónicu predetermináu pola posición de los prismes. Asina se fae, por exemplu, na pareya de prismes que formen el prisma de Risley. Los prismes de cuña pueden usase tamién, como pareya anamórfica, pa cambiar la forma d'un rayu; asina se consigue facer un rayu circular a partir del rayu elípticu qu'emiten los diodos láser.
- Los prismes romboidales úsense pa desplazar llateralmente un rayu de lluz ensin que s'invierta la imaxe.
- Los prismes de cubierta usábense nos barcos pa llevar la lluz del día a la bodega primeru de que s'inventara la lluz elléctrico, pol peligru d'usar veles o llámpares de querosenu pa esi propósitu.

Historia[editar | editar la fonte]

René Descartes tenía observao que la lluz separtábase nos collores del arcu la vieya al travesar vidru o agua, magar que nun se conocía la fonte d'esi collor. L'esperimentu d'Isaac Newton de 1666, que demostró la esviación de la lluz blanco al traviés d'un prisma, fizo evidente que tolos collores coesistíen na lluz, y qu'había estremaos "fotón|corpúsculos" de collor que s'abríen y viaxaben con diferentes velocidaes al traviés del prisma. Sedríen Thomas Young y Augustin Fresnel, posteriormente, los que combinaríen la teoría de les partícules de Newton cola teoría d'ondes de Huygens pa esplicar cómo surde'l collor del espectru de la lluz.

Newton llegó a la so conclusión faciendo pasar el collor roxu d'un prisma al traviés d'un segundu prisma, encontrando al facelo qu'el collor nun cambiaba. D'esto deduxo que los collores teníen que tar presentes na lluz incidente, esto ye, qu'el prisma nun crea collores, sinón que namái separtaba collores que yá taben ehí previamente. Usó tamién una llente y un segundu prisma pa recomponer l'espectru de lluz y volver a xuntalu pa formar una lluz blanco. Esti esperimentu ye ún de los que se consideren exemplos clásicos de la metodoloxía qu'entamó a implantase nel contestu de la nomada revolución científica.

Newton esplicó con gran detalle la dispersión de la lluz nos prismes nel so llibru "Óptica", nel que describió tamién l'usu de más d'un prisma pa controlar la dispersión. La so descripción de los esperimentos que ficiera yera cualitativa; la cuantitativa nun foi necesaria hasta que apaecieron los espansores de rayos láser de prisma múltiple na década del 1980.


Ver tamién[editar | editar la fonte]