Phecda

De Wikipedia
Saltar a: navegación, buscar
Phecda
Phecda
Constelación sietestrellu
Ascensión reuta α 11h 53min 49,8s
Declinación δ +53º 41’ 41’’
Distancia 84 ± 1 años lluz
Magnitú visual +2,44
Magnitú absoluta +0,36
Lluminosidá 71 soles
Temperatura 9500 K
Radiu 3 soles
Masa 2,7 soles (aprox)
Tipu espectral A0Ve
Velocidá radial -12,6 km/s

Phecda, Phekda o Phad ye'l nome de la estrella γ Ursae Majoris (γ UMa / 64 Ursae Majoris / HD 103287),[1] la sesta más brillosa de la constelación del sietestrellu con magnitú aparente +2,44.[2]

Nome[editar | editar la fonte]

El nome de Phecda —en cualesquier de les variantes enriba mentaes— provién del árabe فخذ (faxð), «zanca», pola so localización nel cuerpu de la osa.

D'alcuerdu al astrónomu persa Al-Biruni (sieglos X y XI), esta estrella yera Pulastya —nacíu de les oreyes de Brahmā—, unu de los rishis o grandes sabios de la antigüedá védica. En China yera conocida colos nomes de Ke Seuen Ke y Tien Ke.[3]

Carauterístiques físiques[editar | editar la fonte]

Xuntu con otres estrelles de la constelación —como Alioth (ε Ursae Majoris), Mizar (ζ Ursae Majoris), Merak (β Ursae Majoris) o Megrez (δ Ursae Majoris)—, Phecda forma parte de la Asociación estelar del sietestrellu, un grupu d'estrelles que se mueven al unísonu na mesma rexón del espaciu y que tienen una edá similar; la edá de Phecda envalórase en redol a los 300 millones d'años. Alcuéntrase a 84 años lluz del Sistema Solar, llixeramente más alloñada que les otres cuatro componentes principales del grupu.[4]

Phecda ye una estrella blanca de la secuencia principal de tipu espectral A0Ve con una temperatura superficial de 9500 K. Con una lluminosidá 72 vegaes mayor que la del Sol, el so radiu ye'l triple del radiu solar. La y nel so tipu espectral indica la esistencia d'un discu de gas xiratorio alredor de la estrella, consecuencia de la so alta velocidá de rotación de 168 km/s nel ecuador, 84 vegaes mayor que la del Sol. La mayor parte de les estrelles d'esti tipu son estrelles más calientes de tipu B —denominaes estrelles Be—, ente les que cabo citar a Achernar (α Eridani) o a Gomeisa (β Canis Minoris).[4]

El espectru de Phecda indica la presencia d'una compañera cercana, de la que nada se sabe sacantes ten de ser bien tenue.[4]

Referencies[editar | editar la fonte]