Naha-te
El Naha-te (那覇手, “Nafa-di” n’okinawense) ye, xunto col Shuri-te y el Tomari-te, ún de los tres estilos tradicionales del Kárate d'Okinawa (antiguu Tode: 唐手, “mano de China”). Estes denominaciones, incluyendo les de “Tode” (Tudi) o “Te” (Di, “mano”), qu'englobaben a toes estes escueles, emplegábense sólo enantes de la II Guerra Mundial. En concreto’l Naha-te ye orixinariu de Naha, actual capital de la prefeutura d'Okinawa, Xapón.
Historia[editar | editar la fonte]
El maestru que probablemente más influyó na sistematización y espardimientu del Naha-te foi Kanryo Higaonna (1853-1916), que llegó a tener el grau de “Saiko Shihan” (Gran Maestru).
El maestru Higaonna tenía conocimientos de les artes marciales llocales, pero taba mui interesáu en conocer y estudiar el kenpo chinu, y foi un funcionariu llamáu Arakaki Seisho (1840-1918) el que-y dio la oportunidá. Dempués d'estudiar con él Luohan Quan, Higaonna marchó a China, onde pasó catorce años estudiando artes marciales y herboristería. Nes tierres sureñes de Fujian (Fukien) estudió con dellos maestros, pero sobre too con ún al qu'él llamaba Ru Ru Ko (1852-1930), col qu'aprendió l'estilu de la “Grulla Blanca de Fujian”, qu'había ser la influyencia china más decisiva del Naha-te, tresmitida por exemplu a traviés del kata Sanchin.
Acabante volver a Okinawa, Sensei Higaonna, col envís de devolver los favores y los cuartos qu'invirtieren nél, foi al mercadel que-y facilitara’l viaxe a China y tomó al fíu de so como alumnu.
La sonadía de l'habilidá y eficacia de les sos téuniques espardióse pasu ente pasu, lo que llevó a Higaonna a ser instructor de los miembros de la familia real d'Okinawa. Más tarde, los sos estudiantes, como Chojun Miyagi y Kenwa Mabuni, desarrollaron los sos propios estilos.
Los maestros más conocíos del Naha-te son:
- Kogusuku Isei
- Maezato Ranho
- Arakaki Seisho
- Higaonna Kanryo
- Chojun Miyagi (Goju-ryu)
- Kyoda Juhatsu (Toon-ryu)
- Kenwa Mabuni (Shito-ryu)
Carauterístiques téuniques[editar | editar la fonte]
Les téuniques del estilu Naha-te carauterícense sobre too por ser rápides y a curtia distancia, mui precises, con movimientos circulares y posiciones altes.
El Naha-te, por ser un estilu de “boxéu curtiu”, ye acionáu pa combate al contautu y n’espacios zarraos, y tien bayura de tornes y movimientos corporales (“tai sabaki”) xiratorios pa quitase golpes y, si a mano vien, safase y contratacar. Tien tamién contrataques d'agarre y presión sobre’l brazu atacante. Amás de los golpes, l'entrenamientu inclúi téuniques de respiración, al envís de canalizar la enerxía Ki.
Formes[editar | editar la fonte]
La llista de kates del Naha-te[1] reflexa les téuniques de movimientu y respiración. Kates importantes del estilu son:
- Sanchin
- Saifa
- Seienchin
- Shisochin
- Seipai
- Seisan
Referencies[editar | editar la fonte]
- ↑ http://www.yoshukaikarateinternational.com/Kata_History.html Hestoria del Kata