Morris

De Uiquipedia
Saltar a: navegación, buscar

Morris, de nome verdaderu Maurice de Bevere, ye un dibuxante y guionista de cómic. Nació'l 1 d'avientu de 1923 en Cortrique, en Bélxica y morrió'l 17 de xunetu de 2001 como consecuencia d'una cayida accidental.


A los venti años trabaya como entintador nun estudiu belxicanu de dibuxos animaos (CBA) y atópase con André Franquin, Peyo y Eddy Paape. Más sero, col mesmu Franquin, Will y Jijé, formará un grupu d'ilustradores que llamarán "La Banda de los Cuatro". En 1945, Morris fai la ilustración pa "Le Moustique" y "Het Laatste Nieuws". En 1946, crea'l personaxe de Lucky Luke nuna aventura llamada "Arizona 1880" qu'apaez a finales d'esi añu en "L'Almanach Spirou" d'ediciones Dupuis. El so grafismu, que presentaba nidies influencies de los dibuxos animaos, personalizóse aína. En 1947, l'entamu de "La Mine d'or de Dig Digger" apaecerá nel selmanariu "Spirou".

Morris marcha a Estaos Xuníos nel añu 1949 onde conocerá a Jack Davis y a Harvey Kurtzman y asiste al nacimientu del magazine MAD en 1950. Viaxó pel país colos sos collacios Jijé y André Franquin, y vivió allí durante seis años, nesi tiempu atropó material pa les aventures del so personaxe. Allí conocerá a René Goscinny, que será guionista de Lucky Luke a partir de 1955. El so primer álbum común apaecerá na revista "Spirou" n'agostu de 1955 col episodiu tituláu "Des rails sur la prairie". Les primeres 31 histories de Lucky Luke asoleyaránse en "Spirou", pero depués Morrís, col so personaxe, pasará, en 1968 a la revista Pilote. Morris y Goscinny collaborarán hasta la muerte del guionista, en 1977.

De 1964 a 1967, Morris y Pierre Vankeer realicen "La Chronique du 9e Art", asina como delles histories curties, asoleyaes en "Spirou".

Tres la muerte de Goscinny, Morris trabayó con otros guionistes como Xavier Fauche, Bob de Groot, Jean Léturgie, Hartog van Banda, Vicq, Guy Vidal, etc., utilizando alternativamente los servicios d’unu o otru según los álbumes.

En 1983, Lucky Luke dexa de fumar y cambia'l so pitu por una espiga. El 7 d'abril de 1988, en Xinebra, Morris ye recompensáu pola OMS (Organización Mundial de la Salú) dientro de la Xornada Mundial ensin Tabacu.

A partir de 1987, Morris crea la serie Rantanplan (el perru babayu de les histories de Lucky Luke).

En 1990, funda "Lucky Productions" actualmente "Lucky Comics", asociáu a "Dargaud".

El 27 de xunu de 1992, recibe'l Gran Premiu Especial de XX Aniversariu del "Salón Internacional del Cómic d'Angoulême".

Morris ye unu de los pocos autores consagraos dafechu a un solu personaxe.

Les sos series[editar | editar la fonte]