Menkyo

De Uiquipedia
Saltar a: navegación, buscar

Menkyo (免許) ye una pallabra xaponesa que significa "llicencia". Pue referise al permisu d’enseñanza pa prauticantes de delles artes xaponeses col envís de caltener les tradiciones del ryu. El sistema menkyo data del sieglu VIII.

Artes xaponeses tradicionales[editar | editar la fonte]

Magar que davezu piénsase que namái ye d’usu nes artes marciales, pue tamién usase n’otres artes como la pintura a la tinta (sumi-e), la ceremonia del té (chado), l’arreglu floral (ikebana)o la caligrafía (shodo).

Los distintos koryu empleguen distintes llicencies; en curtio:[1]

  • Okuiri : Aniciu.
  • Mokuroku : Certificáu, y entrada nes llistes oficiales.
  • Shomokuroku
  • Gomokuroku
  • Menkyo: Llicencia.
  • Menkyo kaiden: Alredor de trenta años d’esperiencia.

Menkyo Kaiden[editar | editar la fonte]

Menkyo kaiden (免許皆伝) significa "llicencia de tresmisión total." Ye una llicencia que da la escuela tradicional o koryu cuando se supón que’l prauticante yá lo deprendió too y tien percorríos tolos aspectos del entrenamientu previstos na escuela.[1]

Nel sistema de llicencies menkyo, el menkyo kaiden ye’l nivel más altu de llicencia qu’esiste. El progresu nel sistema nun ta determináu polos años emplegaos nel deprendimientu, sinón polo bien que se domina la disciplina. Sicasí la transición de menkyo a kaiden lleva davezu trenta años d’esperiencia polo menos. De cutiu, anque non siempre, un graduáu col menkyo kaiden ye “de facto” socesor del Soke del koryu.

Comparanza col sistema de graos Dan-i[editar | editar la fonte]

Hai dos sistemes paralelos nes artes o víes marciales xaponeses: menkyo y kyu-dan.[1] Les escueles clásiques (koryu) usen davezu’l sistema menkyo, mientres que les escueles que basen la práutica en formes modernes de budo ("camín, o vía") usen davezu’l sistema Dan-i (kyu/dan) creáu por Jigoro Kano a finales del sieglu XIX pal yudu Kodokan.

Referencies[editar | editar la fonte]

  1. 1.0 1.1 1.2 Ranking Systems in Modern Japanese Martial Arts: Modern vs. Classical por Donn F. Draeger.