Mebyon Kernow

De Wikipedia
Saltar a navegación Saltar a la gueta

Mebyon Kernow (Fíos de Cornualles, MK) ye un partíu nacionalista de Cornualles. Foi fundáu en 1952, y nel 2000 el so xefe yera Dick Cole. El so ideal ye de calter europeísta y celtista, partidariu de guetar un remediu económicu llocal pa dar trabayu a la xente del país. Tamién quieren llevar la llingua y la cultura córniques a la educación del país. Pertenez a la denomada Lliga Céltica, xunto a Mec Vannin, partíu nacionalista maniegu, Unvaniezh Demokratel Breizh, de Bretaña, y Plaid Cymru, formación política nacionalista galesa.

Fundación[editar | editar la fonte]

El 6 de xineru de 1951 la revista New Cornwall patrocinara l'apaición del Mebyon Kernow, nun actu nel hotel Oates de Rysrudh, al que asistieron trece persones y siete más unviaron el so sofitu, ente elles los futuros bardos de Cornualles y un profesor universitariu. Nomaron a Helena Charles presidenta del partíu, a Lambert Truran secretariu, y a George Pawley White tesoreru. Editen el xornal Kenethel Kernewek (Nación Córnica), influyíu polos ideales del Plaid Cymru, de calter celtista y con un programa ente autonomista y federalista, asina como con un vagu reformismu social, que se propon “restaurar la identidá céltica de Cornualles”. Defende la llingua córnica o kernewek y llucha por revitalizala, asina como querer caltener el caráuter de los intereses de Cornualles como nación céltica, too propiciando los adelantos constitucionales que-y permitan algamar l'autodeterminación, al tiempu que promociona la reanudación non solo de la llingua, sinón tamién de la historia, la lliteratura y el deporte propios, como la llucha córnica. Nesti mitin adoptarán los siete oxetivos del partíu:

1. Estudiar les condiciones llocales ya intentar poner remediu a lo que perxudica los intereses de Cornualles al traviés de la opinión pública.

2. Fomentar la llingua y lliteratura córniques.

3. Algamar l'estudiu de la historia córnica dende un puntu de vista propiamente córnicu.

4. Aceptar la idea de que Cornualles ye una de les seis naciones céltiques de la Lliga Céltica.

5. Publicar panfletos, octavilles, artículos y cartes na prensa defendiendo estes idees.

6. Organizar actos y conciertos d'ambiente córnico-célticu en favor de defender el so ideariu.

7. Cooperar con otres sociedaes favoratibles a preservar el caráuter de Cornualles.

En setiembre de 1951 rexistraríase como partíu políticu partidariu del autogobiernu córnicu.

Desendolcu[editar | editar la fonte]

Nes dos primeres décades, nun pasó de ser un pequeñu grupu d'entusiastes. Inda asina, Helena Charles, que dexa de ser la secretaria en 1954 en favor de Cecil Beer, consigue en 1953 un escañu nel conceyu de Camborne-Redruth. Amás, dende 1956 los militantes Helena Charles y P. Pool organizarán campamentos córnicos pa dar a conocer a la xuventú la llingua perdida, cola gramática Cornish for beginners. Con esti panorama, en 1960 el Mebyon Kernow tan solo acapara un centenar de militantes.

Nes eleiciones llocales de 1970 el Mebyon Kernow tan solo consigue'l 2% los votos y una cierta representación a nivel llocal. Gracies a esti fechu en 1971 llegaría al millar de militantes baxo'l lideralgu de Len Truran y Richard Jenkin, que se presentaren nes xenerales de 1970. Pero'l 25 de mayu de 1975 un miembru del MK, James Whetler, que se presentara nes xenerales de 1974 por Truro, abandona'l partíu pa fundar un nuevu grupu, el Party Kenethlegk Kernow o Cornish National Party, más radical ya influenciáu pol SNP escocés (Scottish National Party), miembru de la Lliga Céltica con otros grupos escoceses, galeses, maniegos, bretones ya irlandeses.

Enllaces esternos[editar | editar la fonte]

Páxina Oficial