Francisco de la Vega

De Wikipedia
(Redirixío dende Luis de Muro)
Saltar a: navegación, buscar

Francisco de la Vega Pérez (8 de mayu de 1893-15 de xunu de 1957) foi un escritor n'asturianu y en castellanu. Esplublizó obres col alcuñu de Luis de Muro.

Biografía[editar | editar la fonte]

Nació en La Robellada, conceyu d'Onís el 8 de mayu de 1893. Dende bien críu dedícase a curiar la reciella, llabor esti qu'espeyó n'abondes ocasiones na so obra lliteraria. En 1904 entra de peón nuna teyera d'Ablaña, nel conceyu de Mieres. Con catorce años marcha pa Madrid a trabayar nun chigre propiedá de José Asprón, que nesa dómina yera teniente d'alcalde de la capital y tenía dellos negocios hosteleros. Hacia 1924 compra'l bar Flor, na Puerta del Sol, onde teníen llugar abondes tertulies polítiques y lliteraries. Nel pisu d'arriba nacería en 1941 la revista La Codorniz[1] . Francisco de la Vega y los socios Antonio Pinillos y Manuel Vicente construyen el Cinema Europa, obra racionalista de Luis Gutiérrez Soto, qu'abrirá en 1929 na cai Bravo Murillo. Equí dará en 1930 Miguel de Unamuno la so primer conferencia a la vuelta del destierru. Tamién fue dueñu d'El Universal café de tertulies onde Luis Astrana Marín "escribía y casi vivía", según Juan Antonio Cabezas[2]. Morrió en Madrid el 15 de xunu de 1957.

Vida lliteraria[editar | editar la fonte]

El poeta de La Robellada llegó a tener bona amistá con artistes y escritores d’esta dómina, ente ellos Baltasar Fernández Cue, al que-y dedica los poemes "Acuse de recibo" y "Prometeo". Esti llaniscu de 1878, que foi periodista, dramaturgu y cineasta yá yera famosu cuando vieno d’América en 1933 pol so trabayu na industria del cine de Hollywood. Otru escritor llanisco, Ángel Fernández-Pola, llegó a escribir una comedia llírica titulada "Pastorela" ambientada n'Onís y con un protagonista llamáu Don Francisco de la Riega, inspiráu en Paco de la Vega. La relación ente Alfonso Camín y Francisco de la Vega vien, polo menos, d’entamu de los años 30 al traviés de la revista Norte, que dirixía’l poeta de Roces. Nella el de La Robellada inxertó abondos anuncios publicitarios de los sos negocios en Madrid y, un añu enantes de morrer, tres poemes cuando la revista yá se publicaba en México. Camín tamién tuvo espaciu na so bayurosa obra p’alcordase d’Onís y de Francisco de la Vega, concrétamente en “Ya llegó el Palo de Acebo”, del poemariu “La Danza Prima y Nuevos Poemas”, editáu en México en 1954. Igualmente, Camín na so obra "Momentos. Poesías" dedíca-y otru poema: "A Francisco de la Vega".

Enantes de publicar en volume, Francisco de la Vega yá asoleyara dellos poemes, col alcuñu de Luis de Muro, en "El Eco de los Valles" de Peñamellera y en "El pueblo" de Llanes.

En 1945 apaez "Nostalgia", el primer poemariu de Francisco de la Vega, con entamu de Luis Astrana Marín. Nel volume apaecen cuatro poemes n'asturianu: "Responso", "Ante una reineta", "Un conseyu" y "A Piedad Traviesa". Tamién recueye esti volume dellos poemes en castellán qu'espeyen los llugares que triyare l'autor de neñu y el so oficiu de pastor: "Bucólica", "La Robellada", "Al río Güeña", "La maldición del zagal" y otros.

En 1951 apaez el segundu volume de poesía de Francisco de la Vega: "Momentos líricos". Esta edición recueye poesía apaecía yá en “Nostalgia” y otra nueva que lleyó l’autor nel Aula Magna de San Isidro de Madrid, el 11 de mayu de 1950, nun actu entamáu pola Asociación d’Amigos de Bécquer. La presentación faela'l críticu d'arte Bernardino de Pantorba y l'epílogu Luis Astrana Marín.

Seis meses enantes de la so muerte, el 11 de avientu de 1956, Francisco de la Vega fizo un recital de la so poesía nel Centru Asturianu de Madrid, presentáu pol antigüu redactor d'Avance Juan Antonio Cabezas. Delles de les poesíes yeren de los sos llibros "Nostalgia" y "Momentos Líricos", pero tamién lleyó el poeta un bon garrapiellu de versos inéditos "que integrarán un próximo libro que el autor tiene ya en prensa"[3]. D'esti llibru nun hai noticia.

Obra[editar | editar la fonte]

  • Nostalgia: poesías (1945). Madrid: Gran Capitán.
  • Momentos líricos (1951). Madrid: Gran Capitán.

Poemes sueltos col alcuñu de Luis de Muro[editar | editar la fonte]

  • "Escayos: L'Istoria en groma". El Eco de los Valles, 30 d'abril de 1924.
  • "Escayos: A don Luis Castellanos". El Pueblo, 14 de marzu de 1925.
  • "Mis flores: Para Pepín de Pría". El Pueblo, 5 de xineru de 1929.

Notes y referencies[editar | editar la fonte]

  1. ABC, 26 d'avientu de 1987. [1]
  2. ABC, 7 de febreru de 1974, p. 50.[2]
  3. Asturias: Boletín informativo del Centro Asturiano de Madrid. Añu V, I y II, 1956.

Bibliografía[editar | editar la fonte]

  • García, Antón (1994). Lliteratura asturiana nel tiempu. Uviéu: Conseyería de Cultura.
  • Garcia Arias, Pedro (1959). Antología de poetas asturianos (I Poesía en bable). Uviéu: IDEA.
  • Miner Otamendi, José Manuel (1954). Madrid los hizo hicieron a Madrid. Madrid.
  • Nel Amaro (1990). "Un poeta poco conocíu: Francisco de la Vega". Lletres Asturianes36, p. 162-164.

Enllaces esternos[editar | editar la fonte]