Los Altos (país)

De Wikipedia
Saltar a navegación Saltar a la gueta
República del Sexto Estado de Los Altos
Bandera de Los Altos Los altos.gif
Bandera de Los Altos Escudu de Los Altos
Ubicación
Capital Quetzaltenango
Creación 1838
Disolución 1840

Los Altos foi un país d'América Central que foi creáu como'l sestu estáu de les Provincies Xuníes del Centru d'América nos años 1830. La so capital yera Quetzaltenango y ocupaba lo qu'anguaño ye l'oeste de Guatemala y partes de Chiapas.

El país creóse por diferencies polítiques y tensiones ente la Ciudá de Guatemala per un llau y Quetzaltango y otros territorios occidentales de Centroamérica per otra. L'alderique tocante a la so separtación de guatemala vien de poco depués de la independencia d'España en 1821. La independencia de Guatemala foi garantizada pola Asamblea constitucional federal en payares de 1824, pero hebo una gran oposición a la separtación en Ciudá de Guatemala.

La independencia de Los Altos de Guatemala proclamóse oficialmente'l 2 de febreru de 1838. El gobiernu federal reconoció Los Altos como'l sestu estáu de la xunión y sentó a los sos representantes nel congresu federal el 5 de xunu d'esi mesmu añu. La bandera de Los Altos yera una modificación de la de les Provincies Xuníes del Centru d'América, con escudu nel centru amosando un volcán al fondu y un quetzal rellucente (un páxaru llocal que representaba la llibertá) delantre. Foi la primer bandera centroamericana qu'emplegó'l quetzal como símbolu; dende 1871 forma parte de la bandera de Guatemala.

Cola desapaición de la federación nuna guerra civil, Los Altos declaróse una república independiente. Sicasí, Quetzaltenango y gran parte de Los Altos foi devueltu a Guatemala per aciu la fuercia pol exércitu de Rafael Carrera y Turcios en 1840. El 2 d'abril de 1840 los más de los funcionarios de Los Altos foron fusilados por orde de Carrera. Pela so parte, aprovechándose de la inestable situación, Méxicu arexuntó terrenos que pertenecen anguaño al estáu de Chiapas.

En 1844, 1848 y 1849 produciéronse delles revueltes fallíes escontra la dictadura de Carrera que proclamaron brevemente la independencia de Los Altos.

La rexón inda tien calter propiu na actualidá, y "Los Altos" sigue siendo una denomación común pa la rexón de Quetzaltenango. De forma asemeyada, la parte mexicana de Los Altos suel recibir el nome de "Los Altos de Chiapas".

Enllaces esternos[editar | editar la fonte]