Llagar

De Wikipedia
Saltar a navegación Saltar a la gueta

El llagar ye'l llocal preparáu pa prensar frutos como les uves, mazanes u olives col xeitu de sacar el zusmiu que contienen[1]. El nome surde del recipiente o maquinaria necesario onde se prensa'l frutu. N'Asturies ye vezu llamar llagar a la cadarma onde se maya la mazana pa saca-y la sidra. N'otros llugares, como Galicia, llagar ye'l edificiu onde máyase la uva pa saca-y el vinu.

Dende'l puntu de vista de la construcción, el llagar ye cenciellamente un pequeñu graneru, teyáu o non, de mampostería onde s'atopan unes talles y la prensa mesma, que davezu consistía nun duernu sobro'l que reposa una gran trabe de carbayu o castañu. Los llagares remóntanse a la dómina romana y faen parte de l'arquiteutura popular.

Cadarma[editar | editar la fonte]

Tradicionalmente les estructures del llagar yeren feches d'estaya únicamente de madera pues pensábase que los metales esmanguen la sidra. Enantes de pasar a la prensa, la mazana páñase y dempués máyase col mayu, un martiellu de madera. La prensa'l llagar sofitase nes berines, pieces paraleles y móviles con fenderures onde s'asitia la trabe y onde s'atopen los tornos o fusos que mueven una trabe que se llama verdugu, que prensa la mazana nel fondón o masera, que s'atopa sobro un gran tronco perpendicular a les berines y que llámase sobigañu. El verdugu, tamién llamáu molleru en Lliberdón, presiona unos maderos que davezu llámanse gochos, carneros o pontones y estos presionen la magaya, los restos la mazana, fasta que flúi'l zusmiu que se recueye nel duernu. D'ehí el zusmiu pasa a fermentáse en toneles pa producir la sidra.[2]

Galería de semeyes[editar | editar la fonte]

Referencies[editar | editar la fonte]

  1. Academia de la Llingua Asturiana. «llagar, el». Consultáu'l 20 de xunu de 2019.
  2. Desidras.com. «Llagares» (castellán). Consultáu'l 30 de xunu de 2019.