Limpopo

De Wikipedia
Saltar a navegación Saltar a la gueta
Ríu Limpopo
Limpopo River
Llocalización alministrativa
Xeografía
Mapa
Limpopo watershed topo.png
Confluencia del Limpopo-Shashe.

El ríu Limpopo ye un ríu que naz nel norte de Suráfrica y desagua nel océanu Índicu. Con unos 1.800 kilómetros de llargor (les fontes varien dende los 1.600 km), ye'l segundu más llargu de la rexón, el 10º d'África y el 79º del mundu. Drena una gran cuenca de 413.000 km², la 45ª de los ríos primarios del mundu, mayor que países como Paraguay, Zimbabue o Xapón.

Xeografía[editar | editar la fonte]

El ríu Limpopo naz de la confluencia de los ríos Crocodile y Marico y describe un gran arcu, primeru zigzagueando escontra'l nordés y norte, darréu torciendo escontra l'este y finalmente el sureste.

Sirve de frontera nun tramu d'unos 640 km, dixebrando Suráfrica, na vera sudeste, de Botsuana, nel noroeste, y de Zimbabue, nel norte. Hai dellos rabiones cuando'l ríu cai pola escarpia interior d'África del Sur.

Les agües del Limpopo cuerren bien lentes y llenes de sedimentos. La precipitación ye estacional y cambiadiza. N'años secos, los sectores cimeros del ríu flúin mientres 40 díes o menos. La área de captación cimera ye greba, nel desiertu de Kalahari, pero faise menos greba ríu abajo. La desaguada y zona inferior ye fértil y ta densamente poblada. Los hinchentes dempués de la temporada lluviosa son un problema esporádicu nel calce inferior; la más notable fueron los catastróficos hinchentes en febreru de 2000, causaes pola trupa precipitación y un ciclón.

Na esquina nordés de Suráfrica'l ríu toca la mayor zona de caltenimientu. Unos 14 millones de persones viven na cuenca del ríu de Limpopo, una área d'alredor de 413.000 km². La demanda d'agua entepasa'l suministru. La mayor parte de la xente que vive na cuenca del ríu de Limpopo ye probe, y la fame y la desnutrición son abondo comunes mientres les seques o cuando se malogran les colleches.

Tien una rica fauna ente la que destaca una numberosa población d'hipopótamos.

Afluentes[editar | editar la fonte]

El tributariu principal ye'l ríu Olifants (o Letaba, el ríu de los Elefantes), con 560 km de llargor y una cuenca de 54.570 km². La ciudá portuaria de Xai-xai (Mozambique) ta cerca de la boca del ríu. Dende'l Olifants, el ríu ye permanentemente navegable hasta'l mar, anque esisten bancos de sable qu'apexen l'accesu de los barcos grandes sacante con marea alta.

Otros afluentes importantes son, en direición enagües embaxo, los ríos Crocodile (350 km y con una cuenca de 29.572 km²), Notwane (270 km y una cuenca de 18.053 km²), Mogalakwena (310 km y una cuenca de 19.195 km²), Motlouse (310 km y una cuenca de 19.058 km²), Shashe (300 km y una cuenca de 18.991 km²), Mzingwane (190 km y una cuenca de 15.695 km²), Sand (350 km y una cuenca de 15.630 km²), Bubi (320 km y con una cuenca de 8.619 km²), Luvuhu (255 km y una cuenca de 4.826 km²), Mwenezi (310 km y una cuenca de 14.759 km²), Olifants, Mokolo (230 km y una cuenca de 8.387 km²) y Changane (510 km y una cuenca de 65.570 km²).[1]

Historia[editar | editar la fonte]

El navegante portugués Vascu da Gama foi'l primer européu en ver el ríu, cuando nuna de les sos espediciones fondió na so desaguada en 1498. Sicasí, hubo residencia humana na rexón dende tiempu inmemorial: el valle Makapans, cerca de Mokopane, contién fósiles Australopithecus de fai 3,5 millones d'años.

El ríu Limpopo foi inmortalizado nel cuentu El neñu del elefante pol autor británicu Rudyard Kipling, en Tan solo histories, onde ye descritu como «el gran Ríu de Limpopo gris verde, grasientu, tou arrodiáu con árboles de fiebre», onde mora la culiebra pitón de roca bicolor».

Referencies[editar | editar la fonte]

  1. Los datos de llargor y superficie de les cuenques proceden del sitiu «The Limpopo River Awareness Kit», en «The Limpopo River Basin», disponible en llinia en: [1] (n'inglés).

Enllaces esternos[editar | editar la fonte]

Limpopo