La 10

De Wikipedia
Saltar a navegación Saltar a la gueta

La 10 foi una cadena de televisión privada española d'ámbitu nacional qu'emitió al traviés de la TDT. Taba operada por SGT Net TV, propiedá del 'Grupo Vocento'. Entamó les sos emisiones a nivel estatal el 20 de setiembre de 2010 y finaron el 1 de xineru de 2012.

Historia[editar | editar la fonte]

La 10 foi nos sos incios una rede de televisiones autonómiques y locales de calter priváu propiedá del Grupo Vocento llamada Punto TV, qu'entamó en 2005. N'ochobre de 2006, Punto TV cuntaba con 50 canales de televisión en 39 provincies, emitiendo con teunoloxía analóxica y con una audiencia potencial qu'algamaba los 12 millones de persones.

En mayu de 2008, Punto TV dexó d'emitir como cadena, pasando a ser un distribuidor de conteníos, que les televisiones asociaes podríen situar como quixeran na so parrilla, y amás siguió encargándose de la comercialización pa los anunciantes nacionales nestes cadenes.

A partir d'ehí, les llicencies de Punto TV fueron ocupaes por canales tamién de Vocento. Estos canales fueron: Canal 10 TV, M7, Albacete TeVe, Ciudad Real TeVe, Cuenca TeVe, Guadalajara TeVe, Toledo TeVe, Urbe TV, Ceuta TV, Álava 7 TV, Teledonosti, Bizkaia TV, Televisión Rioja y La Verdad TV.

En 2010, Vocento plantegó la posibilidá de desendolcar una FORTA privada na TDT p'agrupar a delles de les sos cadenes autonómiques y locales baxo una mesma marca. Les cadenes elexíes pal proyeutu yeren: Avista TV (Andalucía), Las Provincias TV (Comunidá Valenciana), Canal 6 (Murcia), Onda 6 (Madrid), Televisión Rioja (La Rioxa), Álava 7 TV (Álava), Teledonosti (Guipúzcoa) y Bilbovisión (Vizcaya).

Finalmente ocurrió y nació La 10, una rede privada de televisiones autonómiques del Grupo Vocento que se punxo en marcha na Televisión Digital Terrestre nel añu 2010.

Les televisiones autonómiques y locales de Vocento apostaben por contenía de proximidá y cuntaben col sofitu del posicionamientu multimedia y multisoporte que-yos permitía aprovechar al máximu les sinerxies existentes y lliderar les audiencies nes provincies nes qu'operaba.

Les canales mencionaes enriba, que fueron elexios pa la rede de televisiones privaes, poseíen llicencies dixitales rexonales en Madrid, Comunidá Valenciana, Andalucía, Murcia, La Rioxa y, anque más bien locales, tamién n'Euskadi. Estes televisiones coles que cuntaba'l grupu, entamaron les sos emisiones el 17 de mayu de 2010, excepto n'Andalucía, onde entamos el 22 de marzu en prebes y el 4 de mayu de forma regular[1].

El 20 de setiembre de 2010, entamó a emitir un nuevu canal estatal col nome La 10, colos mesmos conteníos que les canales autonómiques[2], fechu que provocó que les televisiones autonómiques siguieren caminos diferentes: dos de les tres cadenes vasques tornaron a les sos antigues denominaciones (Álava 7 TV y Teledonosti), mientres La 10 de Bizkaia pasó de nomase Bizkaia TV (en llugar del nome orixinal BilboVisión); en Murcia convirtióse en La Verdad TV y en La Rioxa recuperó'l nome antiguu: Televisión Rioja.

No que cinca a La 10 Madrid, La 10 Andalucía y La 10 Comunidad Valenciana, siguieron durante varies selmanes emitiendo los conteníos de La 10, a la espera de ver si dalguna otra empresa audiovisual aceptaba los requisitos que-yos imponía'l grupu Vocento pa facese cargu de la so xestión, pues nun resultaba nin rentable económicamente nin compatible en términos llegales qu'ufrieren la mesma programación que yá emitía La 10 al través de la so señal estatal[3]. Finalmente, Vocento llegó a un alcuerdu cola empresa Smile Advertising y el 25 d'ochobre de 2010 entamó les sos emisiones en prebes por estes frecuencies la canal Metropolitan TV, con una programación xeneralista e informativa. Les emisiones reulares de Metropolitan TV entamaron el 1 de payares de 2010.

El 20 de setiembre de 2011, día del so primer aniversariu, Vocento anunció que, como nun había sío capaz de consolidar el so proyeutu xeneralista con La 10, tenía decidío cesar la producción propia, despidiendo a una plantilla de 14 trabayadores del canal ente redactores, cámares, resalizadores y productores. Tamién s'anunció el pieslle del canal y l'alquiler de la so llicencia. Dende entós, La 10 esperó pasar a ser xestionada por una empresa extranxera [4].

La 10 cesó les emisiones el 1 de xineru de 2012 a las 22:00 horas de la nueche, tres más de tres meses sin emitir conteníos de producción propia. Vocento anunció un alcuerdu d'explotación con un sociu d'orixe extranxeru pa la emisión d'una canal d'entretenimientu temáticu qu'entamaría l'actividá durante el primer trimestre. Tras el pieslle de la xeneralista del grupu, La Tienda en Casa, una canal de comunicación comercial xestionada por El Corte Inglés, ocupó la frecuencia hasta l'iniciu d'emisiones de la nueva canal, que llegó durante el mes d'abril de 2012.[5][6][7] Finalmente, foi'l 1 de marzu de 2012 el día nel que s'anunció el llanzamientu de Paramount Channel,[8] propiedá de Viacom International Media Networks (VIMN), que sustitúi a La 10 dende'l 22 de marzu de 2012.[9]

Audiencies[editar | editar la fonte]

Añu Xineru Febreru Marzu Abril Mayu Xunu Xunetu Agostu Setiembre Ochobre Payares Avientu Media añal
2010 - - - - - - - - 0,1%** 0,3% 0,3% 0,3% 0,3%
2011 0,3% 0,4% 0,5% 0,5% 0,4% 0,5% 0,6% 0,6% 0,6% 0,7% 0,7%* 0,6% 0,5%

* Máximu hestóricu. ** Mínimu hestóricu.

Referencies[editar | editar la fonte]