Kumite

De Uiquipedia
Saltar a: navegación, buscar
Choki Motobu faciendo kumite (1926)

El Kumite (xaponés 組手, llit. “alcuentru de manes”) ye, xunto col Kihon y el Kata, ún de los componentes del entrenamientu del Kárate[1]; en xeneral el términu pue tornase a combate, masque nel kárate modernu ye una forma de competición y una parte más del entrenamientu, dividiéndose en delles modalidaes con fines pedagóxicos. Tampoco nun foi siempre parte de les clases, porque antiguamente los maestros atalantaben que yera arriesgáu prauticalu ensin qu’hubiera un peligru real pa la vida o la integridá física del karateca.

En xeneral esisten tres tipos d’entrenamientu del combate: jyu kumite (自由組手), o combate llibre controláu; shiai kumite (試合組手), combate de competición, semillibre, con más o menos control de los golpes dependiendo del reglamentu; y yakusoku kumite (約束組手), combate combináu.

Yakusoku kumite[editar | editar la fonte]

El combate combináu tien denomaciones estremaes[2] según l’estilu de kárate[3]. Por casu nel estilu Shotokan llámase kihon kumite (基本組手) y tien les siguientes variantes:

  • Ippon kumite (一本組手): combate a un movimientu. L’oxetivu ye crear nel prauticante la idea de vencer con un únicu golpe, pa lo que ye necesario desendolcar delles habilidaes secundaries, como la observación, pal analís de les situaciones. La noción d’espaciu y tiempu (maai en xaponés) ye’l factor fundamental, asina como’l conocimientu real del propiu cuerpu y de les sos llendes físiques y mentales.
  • Sanbon kumite (三本組手), combate a tres movimientos. L’oxetivu ye aumentar l’axilidá del qu’ataca y del que defende. Tien d’executase cola máxima intensidá y velocidá de movimientos, porque solo asina pue algamase’l control necesariu pa dominar les téuniques utilizaes. El cuerpu tien de trabayar como una unidá que se mueve pel área de combate.
  • Gohon kumite (五本組手), combate a cinco movimientos, col envís de fortalecer el puxu de los prauticantes per aciu de secuencies d’ataque y defensa. El gohon kumite tien de prauticase hasta la galdidura, procurando realizar cada movimientu col mayor tinu y fidelidá posibles.

Shiai kumite[editar | editar la fonte]

Combate con regles oficiales y tiempu fixos, ye la modalidá emplegada nes competiciones[4]. Según qué organización promueva’l tornéu, varien la cuenta y valoración de les téuniques, siendo les más comunes shobu ippon, shobu ippon han y nihon: unu, unu y mediu y dos puntos respeutivamente.

Puntuación nos torneos WKF[editar | editar la fonte]

Nel reglamentu de competición de la WKF (Federación Mundial de Kárate), el kumite faise a los puntos, contando más les pataes que los puñetazos. El combate tien llugar nuna zona llendada por una franxa que nun pue ser trespasada por nengún competidor, yá que, si un participante sal d’ella, recibe jogai (falta de categoría 2).

Los puntos danse d’esta miente:

  • 1 puntu (ippon): Golpes de puñu chudan (troncu) o yodan (cabeza).
  • 2 puntos (nihon): Pataes a nivel chudan.
  • 3 puntos (sanbon): Pataes a nivel yodan, o golpiar al otru cuando ta en suelu, teniendo un máximu de 2 segundos pa facelo.

Nes competiciones tán torgaos los golpes per debaxo la cintura, asina como l’emplegu de coldos y rodiyes, o cualesquier otra téunica que los xueces atalanten peligrosa. L’usu d’una téunica torgada supón una alvertencia y dempués (o inclusive darréu) sanciones. Si se reincide néstes, ye l’adversariu’l que recibe puntos. Trés sanciones de categoría 1 impliquen la eliminación por hansoku.

Otros tipos de puntuación[editar | editar la fonte]

Esisten tamién otros tipos de puntuación venceyaos a estilos concretos (por exemplu al Kyokushinkai)[5][6] o reglamentos específicos n’escueles non afiliaes a la WKF.

Jyu kumite[editar | editar la fonte]

Ye’l combate llibre d’entrenamientu, ensin regles, con usu llibre de tou tipu de téunica, tanto de brazos como de piernes, llaves, proyeiciones, estrangulamientos, etc., anque esto último varia d’escuela a escuela, inclusive de maestru a maestru. Sicasí los prauticantes han caltener siempre’l respetu pol compañeru y curiar que los golpes nun puedan mancalu, darréu que la finalidá ye desarrollar les habilidaes nel arte y non vencer al otru.

Tien una variante llamada jyu ippon kumite (自由一本組手), que ye un combate semillibre a un únicu golpe, col envís de favorecer el desarrollu de vivencies corporales en situaciones de llucha real y asina preparar el cuerpu y la mente pa elles.

Jissen kumite[editar | editar la fonte]

Antaño nos estilos tradicionales, en situaciones de combate real por aciu d’un desafíu personal o de la práutica del “dojo yaburi” (desafíu al dojo per parte d’otra escuela), esa llucha recibía la denomación de jissen kumite (実戦組手)[7]. Poro, nun ye una forma d’entrenamientu.

Referencies[editar | editar la fonte]

  1. http://www.aikido-judo-karate.com/karate/karate-kumite-techniques "Karate Kumite Techniques"
  2. http://www.karatedinamic.ro/karate/kumite
  3. http://www.deweysmartialartsacademy.com/Seiko_Yakusoku_Kumite_1.html Yakusoku Kihon Kumite
  4. El Kumite en el karate
  5. http://karate.roiz.org/staticpages/index.php?page=20040617195128865
  6. http://www.kyokushin.co.uk/full.htm
  7. http://www.shitokaihonduras.org/kumite.html Kumite Karate

Enllaces esternos[editar | editar la fonte]