Gumboot
La danza gumboot o gumboots, tamién conocida como isicathulo,[1] ye una danza africana que ye executada por unos baillarinos que lleven puestes unes botes d'agua, tamién conocíes como «botes Wellington». En Sudáfrica estes botes reciben la denominación gumboots. Les botes pueden ser afataes con cascabeles, por que suenen cuando los baillarinos tríen el suelu. Estos soníos constituyíen una serie de códigos o avisos distintos pa comunicar daqué a otra persona asitiada a poca distancia. Foi utilizáu básicamente por que los trabayadores pudieren comunicase ente sigo nes mines, yá que taba rigorosamente prohibíu falar so amenaza de recibir un castigu per parte del xefe.
Orixe[editar | editar la fonte]
El baille gumboot foi concebíu mientres los tiempos del apartheid polos mineros negros en Sudáfrica como una alternativa a los tambores, que fueren acutaos poles autoridaes. Otra razón pa practicar el baille gumboot pa los mineros de Sudáfrica yera que cantaben mientres trabayaben. La danza gumboot convirtióse nuna danza conocida en tol mundu nes escueles los neños interpreten la danza.
«La hestoria de la danza gumboot en Sudáfrica ye similar: concebida polos mineros negros como una alternativa a los tambores que les autoridaes acutaron, utilizaba los oxetos disponibles, tales como botes d'agua, llates y tapones de botelles.»[2]
Les botes fueron una solución a un problema consistente en que les mines d'oru con frecuencia taben anubiertes; nelles los homes enfotábense trabayando nos sos puestos de trabayu cola agua hasta les rodíes.
«Los suelos de les mines de cutiu taben anubiertos, con un drenaxe probe o inesistente. Pa los mineros, les hores que permanecíen de pies n'agües infestaes que-yos llegaben hasta les rodíes provocábenlos úlceras na piel, problemes nos pies y la consiguiente perda de tiempu de trabayu. Los patrones afayaron que'l suministru de gumboots (botes d'agua) a los trabayadores yera más baratu qu'intentar drenar les mines. Esto dio llugar al uniforme de los mineros, consistente en grandes negres botes d'agua, pantalones vaqueros, el torso descubiertu y pañuelos p'absorber el sudu que diba escontra los güeyos.»[1]
Descripción[editar | editar la fonte]
Los baillarinos de gumboot son comúnmente vistos nes cais y places de les zones turístiques en Sudáfrica, tales como Victoria & Alfred Waterfront en Ciudá del Cabu. Esta danza inda ye practicada anguaño por dellos mineros. La danza anicióse probablemente ente los mineros d'oru sudafricanos,[3] y, especialmente, nes sos dures condiciones de trabayu -qu'incluyíen un llume deficiente y mugor. Munchos de los pasos y les rutines son parodies de los oficiales y guardias que controlaben les mines y los cuarteles de los trabayadores. Como otres formes de danza africana, el gumboot utiliza los conceutos de la polirritmia y l'articulación total del cuerpu, basándose nes dances culturales de los trabayadores africanos de les mines.[4] Trátase d'una danza percusiva que se realiza por aciu idiófonos (oxetos de la vida cotidiana que cimblen por ellos mesmos), y ye similar n'execución y estilu a les formes de «stepping» interpretaes poles fraternidaes y hermandad afro-americanes.
Apaiciones fora del contestu básicu[editar | editar la fonte]
La danza ye'l puntu culminante de la execución de Black Umfolosi, un prominente grupu de música folk de Zimbabue.[5]
L'álbum Graceland del cantante pop estauxunidense Paul Simon contién un cantar tituláu "Gumboots", que ye interpretada nel estilu township jive (mbaqanga) de Sudáfrica y contién les execuciones de los miembros de Boyoyo Boys.[6]
El compositor británicu-estauxunidense David Bruce escribió un quintetu de clarinete tituláu "Gumboots",[7] que ta inspiráu na danza gumboot. Esta pieza foi encargada pol Carnegie Hall en 2008 y puede ser escuchada na so totalidá na so páxina web,[8] interpretada por Todd Palmer y el St. Lawrence String Quartet.
Dende les décades de 1990 y de 2000 el Coru Escolar Drakensberg Boys basáu na danza gumboot la parte folclórica-africana del so repertoriu. Introducen dellos cambeos rellacionaos col so vestuariu pa los conciertos; la primer variante ye un paxellu clásicu «d'home blancu» y la segunda variante son les botes d'agua de color blancu.
Referencies[editar | editar la fonte]
Notes[editar | editar la fonte]
- ↑ 1,0 1,1 «Isicathulo». Project Malawi. Consultáu'l 10-03-2013.
- ↑ Gilbert, Helen & Tompkins, Joanne: Post-colonial drama: theory, practice, politics. Psychology Press, 1986, p. 103.
- ↑ Norris, Michele: «Step Afrika». NPR. Consultáu'l 10-03-2013.
- ↑ Welsh, Kariamu: African Dance. Chelsea House, 2004 [1996], p. 28.
- ↑ «Amuesa en videu de Black Umfolosi». YouTube. Consultáu'l 10-03-2013.
- ↑ Muller, Carol A.: Focus: Music of South Africa. Routledge, 2008, p. 150.
- ↑ «Gumboots». DavidBruce.net. Consultáu'l 10-03-2013.
- ↑ «Gumboots». CarnegieHall.org. Consultáu'l 10-03-2013.
Bibliografía[editar | editar la fonte]
- Gilbert, Helen & Tompkins, Joanne: Post-colonial drama: theory, practice, politics. Psychology Press, 1986.
- Muller, Carol A.: Focus: Music of South Africa. Routledge, 2008, cap. 9.
- Romera Naranxal, Francisco Javier: «Percusión corporal n'Indonesia y Sudáfrica». Música y Educación, 93 (26):38-47, 2013.
- Romera Naranxal, Francisco Javier: «Science & art of body percussion: a review». Journal of Human Sport and Exercise, 8 (2), 2013.
- Welsh, Kariamu: African Dance. Chelsea House, 2004 [1996].
Enllaces esternos[editar | editar la fonte]
Wikimedia Commons acueye conteníu multimedia sobre Gumboot.- «La danza de les botes de goma». ABC, 10-10-2009.
- «Lesole's Dance Project - South African Gumboots» baillarinos con cascabeles nes botes d'agua en YouTube.
- «Gumboots» en Otoplasma.com.
