Fuelga minera d'Asturies de 1962

De Wikipedia
Saltar a navegación Saltar a la gueta
Pozu Lláscares de La Felguera, una de les mines que los sos trabayadores participaron de la fuelga

La fuelga minera d'Asturies de 1962 foi una fuelga obrera que tuvo llugar na primavera de 1962 mientres el franquismu.

La fuelga[editar | editar la fonte]

Yá en 1957 y 1958 tienen llugar fuelgues nel Pozo María Luisa y nes mines de Carbones La Nueva. En 1962, siete mineros fueron despidíos del Pozu San Nicolás (Nicolasa) de Mieres (Asturies) en reivindicando meyores llaborales y salariales. Foi'l puntu de partida d'una fuelga que duró ente abril y xunu nes Cuenques Mineres asturianes, estendiéndose per Mieres, Llangréu, Samartín del Rei Aurelio, Xixón, etc. y más tarde a otres 27 provincies españoles, llegando les sos repercusiones al estranxeru.[1] Al empar que n'Asturies, tamién en Francia y Bélxica taben llevándose a cabo conflictos mineros anque éstos yeren llegales al tar baxu réximes democráticos. Nesi momentu les condiciones salariales de munchos mineros yeren bien precaries, a pesar de les polítiques paternalistes de Girón de Velasco, situación denunciada inclusive pola Ilesia española.[2]

Repercusión[editar | editar la fonte]

El Réxime, que la so máxima autoridá n'Asturies yera Marcos Peña Royo, respondió reprimiendo a les families mineres que participaron en dicha fuelga, amás de la represión "silenciosa" y cruenta de les fuercies del orde de la dómina, como la Guardia Civil. Fueron despidíos munchos mineros y, otros, fueron unviaos fora d'Asturies. Sicasí atenderíense a dellos pidimientos de los mineros, axustando'l secretariu xeneral del Movimientu, José Solís Ruiz, direutamente colos güelguistes. Les soluciones fueron publicaes nel BOE.[3] A la fuelga siguiéronlu movimientos de protesta y sofitu en Madrid y Barcelona, según concentraciones en delles ciudaes europees y americanes, faciéndose tamién ecu de la mesma los diarios Monde, New York Times o Il Corriera della Sera.

Pablo Picasso inmortalizó en 1963, con un dibuxu d'una llámpara de mina, estos fechos. Aunió esfuercios na llucha democrática contra'l Réxime y supunxo el sofitu esplícitu de dellos intelectuales, inusual hasta entós, y común a partir d'esti momentu hasta'l final del franquismu.

Filmografía[editar | editar la fonte]

  • 2002 Documental "Hai una lluz n'Asturies..."
  • 2007 Curtiu "A golpe de tacón" (Amanda Capo)[1]
  • 2012 Documental "La fuelga del silenciu" (Documentos TV)

Bibliografía[editar | editar la fonte]

  • 2002 "Les fuelgues de 1962 n'Asturies" Vega, Rubén (Coord.) Trea. Xixón.
  • 2008 "La roxura y el silenciu. Asturies 1962" Martínez Reverte, Jorge. Espasa. Madrid.

Referencies[editar | editar la fonte]

Enllaces esternos[editar | editar la fonte]




huelga minera de Asturias de 1962