Fontenebrosa: El reinu de los Silentes

De Wikipedia
Saltar a navegación Saltar a la gueta
Fontenebrosa: El reinu de los Silentes
obra lliteraria
Datos
Autor Vicente García Oliva
Fecha 1984
Llingua de la obra asturianu
Cambiar los datos en Wikidata

Fontenebrosa: el reinu de los silentes ye un llibru de Vicente García Oliva que se convirtió na primer novela xuvenil de la lliteratura asturiana. Publicada pela primer vez nel 1984 (Comuña) y nel 1992 por Ediciones Trabe, nel 2010 publicóse la tercer edición, que fala bien claro del so éxitu.

Argumentu[editar | editar la fonte]

Na Edá Media esistía un reinu bien curiosu llamáu Fontenebrosa. Goyo recibe un día un mensaxe del padre, al que contaba muertu, onde-y pide ayuda. Asina empieza la gran aventura, la busca d'un llugar que llamen Fontenebrosa y la llucha pola llibertá personal y pola lliberación d'un pueblu sometíu a la tiranía de Rodolfo, el Señor del Ferre, un personaxe siniestru.

Interpretaciones[editar | editar la fonte]

La novela, que munchos comparen con otres obres desarrollaes nuna época medieval y máxica como El Señor de los Aniellos, asocede nun mundu paralelu onde hai un país que se llama Fontenebrosa, que ta dividíu en tres grandes estayes: la de los silentes, la de los furadores y la de los homosaurios. Munchos entienden qu'esto ye una metáfora mesma d'Asturies -un país dividíu en tres grandes árees: occidental, central y oriental-. Amás, el Señor del Ferre convierte a los sos enemigos en silentes, xente que nun pue falar, lo que tamién s'interpreta como una metafora sobre la falta de reconocimientu xurídicu de la llingua asturiana. Tamién pue entendense la llucha que llidera Goyo pa lliberar al pueblu de Fontebrosa del señor del Ferre como una metáfora sobre la busca de la llibertá d'Asturies como un pueblu con una identidá diferente de la castellana. Sicasí, según declaró l'autor nel 2010 nuna entrevista en Les Noticies, Fontenebrosa nun ye una metáfora d'Asturies.

Segunda parte[editar | editar la fonte]

Fontenebrosa II. La rebelión de los homosaurios ye la segunda parte de Fontenebrosa, publicada nel 2011 por Trabe. Agora son los homosaurios los que, axudaos por Goyo, Ximena y la so xente, han lluchar contra’l malváu magu Paniceres y el Dogom Tuclum. Con esta segunda parte, Vicente García Oliva enancha’l mundu simbólicu y máxicu de Fontenebrosa, con una obra de ritmu rápidu, aición, bonos y malos, que ye un cantu a la llibertá.