Festival Internacional de Cine de Berlín

De Wikipedia
Saltar a navegación Saltar a la gueta
Icono de esbozo
Esti artículu ye un entamu. Pues ayudar a la Wikipedia n'asturianu ampliándolu.


El Festival Internacional de Cine de Berlín (inglés: Berlin International Film Festival, alemán: Internationale Filmfestspiele Berlin), tamién nomáu Berlinale, ye ún de los festivales de cine más perimportantes del mundu. Tien llugar na ciudá de Berlín (Alemaña) dende 1951, celebrándose nel mes de febreru dende 1978.

Anguaño, en caúna de les ediciones del festival véndense más de 300.000 entraes y entren a los cines unes 475.000 persones, siendo 3.700 el númberu de periodistes (de más de 80 países) y 16.000 el de profesionales (de más de 120 países) que s'acrediten. Amás, son más de 1.000 les proyeiciones añales de les más de 400 películes que participen nes distintes seiciones. Pa too ello, el festival cunta con un presupuestu de 19,5 millones d'euros.

El direutor de la Berlinale ye, dende mayu de 2001, Dieter Kosslick. Na seición competitiva del festival, al rodiu de venticinco películes lluchen por algamar el premiu principal: l'Osu d'Oru a la Meyor Película. Repártense tamién dellos premios secundarios nesta seición, nomaos Osos de Plata.

El 64ᵘ Festival Internacional de Cine de Berlín ta programáu pa celebrase del 6 al 16 de febreru de 2014.

Seiciones[editar | editar la fonte]

El festival ta compuestu por nueve seiciones, escoyendo el direutor o la direutora de caúna les películes que nella participen. Nesta xera participa tamién un comité d'espertos qu'ayuda na seleición.

  • Competición (Wettbewerb): ye'l corazón del festival dende'l so entamu en 1951. Cada añu acueye los estrenos internacionales y mundiales de unes veinticinco películes que participen nella. La seleición final de les películes cuerre a cuenta del direutor de la Berlinale.
  • Curtios Berlinale (Berlinale Shorts): la Berlinale entrega premios específicos pa curtiumetraxes dende 1955 pero ye solo dende 2003 que'l festival cunta con un xuráu internacional esclusivu pa esti tipo de trabayos. La seición naz en 2007 dempués de la xuntura de los programes de curtiumetraxes de les seiciones Competición y Panorama. Cola creación d'esta nueva seición dixebrada, el festival quier destacar la importancia de los curtios na industria del cine.
  • Panorama: anque naz en 1986, el so orixe ye'l programa Info-Schau de los años 70. En 1980 encárgase-y a Manfred Salzgeber dá-y forma al conteníu y en 1982 Salzgeber xunió al so equipu a Wieland Speck (que diba pasar a ser el cabezaleru de la seición en 1992), col que desarrolló un programa dirixíu a lluches sociales ensin evitar películes incómodes. La seición fae de puente ente la visión artística y los intereses comerciales, pudiendo topase nella películes nueves de direutores renomaos, óperes primes y nuevos descubrimientos. Tradicionalmente, esta seición acueye cine d'autor (esto ye, películes con una firma individual). Toles películes de Panorama estrénense a nivel européu o mundial na Berlinale.
    • Panorama: unes 18 películes dirixíes al públicu de cine d'autor en xeneral.
    • Panorama Dokumente: al rodiu de 16 documentales sobre temes sociales actuales, reportaxes en profundidá, documentales musicales o retratos d'artistes.
    • Panorama Special: otres 14 producciones independientes y películes de les grandes productores de los Estaos Xuníos d'América.
  • Forum: l'orixe de la seición ye'l International Forum of New Cinema que se fundara nos caberos años de la década de los años sesenta. Nesa época de fondu debate políticu públicu, Ulrich y Erika Gregor (que dirixeron la seición hasta qu'en 2001 -y dieron el relevu a Christoph Terhechte) xunto al Freunde der Deutschen Kinemathek e.V. queríen facer del cine un sitiu d'intercambiu cultural como contrapesu a la Berlinale. Dende 1970, el Forum ye un elementu permanente del programa del festival que lu ayuda a ser más diversu. Esta ye la seición más atrevida de la Berlinale y tien poques llendes formales no tocante a la seleición de les películes: cine esperimental, de vanguardia, ensayos, reportaxes políticos,... En 2006 entamó'l Forum Expanded, que da una perspeutiva crítica y un sentíu más ampliu de la cinematografía.
  • Xeneración (Generation): dende 1978 el programa d'esta seición incluye cine pa neñes y neños y xente mozo asina como películes pa tolos públicos que son tamién afayadizos pa xente xoven. Cada añu asisten a les sesiones d'esta seición más de 60.000 visitantes. La seición ta formada por dos competiciones: Generation Kplus y Generation 14plus.
  • Perspeutiva de cine alemán (Perspektive Deutsches Kino): ye un escaparate pa les tendencies temátiques y artístiques de la siguiente xeneración de cineastes alemanes. Esta seición abelluga a los talentos na direición que tán faciéndose un nome propiu na escena alemana. Escuéyense al rodiu de 12 películes del añu anterior, tanto películes documentales como de ficción, con una duración de polo menos 20 minutos.
  • Berlinale Especial (Berlinale Special): nesta seición, el festival enseña producciones nueves y estraordinaries y honra a grandes personalidaes del mundu del cine proyeutando les sos películes. Tamién puen programase nesta seición películes que merecen una atención especial.
  • Retrospeutiva (Retrospektive): seición dedicada a la hestoria del cine que prográmase dende 1977. La retrospeutiva siempre ta dedicada a a un direutor importante o a un tema históricu. Normalmente proyéutense verisones restauraes de les películes o copies nueves. Dende 2013 la seición incluye Clásicos de la Berlinale (Berlinale Classics) y preséntense restauraciones o reconstrucciones independientes del tema de la Retrospeutiva. En 2014, el tema de la seición ye La estética de la solombra. Estilos d'illuminación. 1915-1950 y va a facese l'estrenu mundial de la version restaurada dixitalmente de la película Das Cabinet des Dr. Caligari (Robert Wiene, 1920).
  • Homenaxe (Hommage): proyeución de los trabayos más importantes de la personalidá a la que se-y entrega'l Osu d'Oru Honoríficu, premiu a los llogros de toa una vida.
  • Añalmente preséntense amás un programa de presentaciones especiales qu'abren neuves perspeutives y echen-y un gueyu a temes claves, faen neuves conexones y expolern campos onde'l cine crúzase con otres disciplines creatives. En 2014, estes presentaciones van ser: Cine Culinariu (Kulinarisches Kino), La Berlinale va al barriu (Berlinale goes Kiez) y Nativu, un viaxe al cine indíxena (Native - a journey into indigenous cinema).

Xuraos y premios[editar | editar la fonte]

  • Xuráu Internacional: polo menos por siete personalidaes alemanes y estranxeres nomaes pol direutor del festival, que pue participar nes deliberaciones del xuráu pero nun tien votu. Los premios qu'entrega esti xuráu, son los que vienen darréu (nengún premiu pue quedar ermu, na más un premiu pue concedese ex aequo y nun pue dase más de un premiu a cada película, esceuto los premios interpretativos):
    • Osu d'Oru a la Meyor Película, qu'entrégase al productor de la película.
    • Osu de Plata - Gran Premiu del Xuráu.
    • Osu de Plata - Premiu Alfred Bauer, en memoria del fundador del festival pa una película qu'abra nueves perspeutives.
    • Osu de Plata al Meyor Direutor.
    • Osu de Plata a la Meyor Actriz.
    • Osu de Plata al Meyor Actor.
    • Osu de Plata al Meyor Guión.
    • Osu de Plata a un Llogru Artísticu Estraordinariu nes categoríes de cámara, montaxe, banda sonora, vestuariu o direición d'arte.
  • Xuráu Internacional de Curtios: compuestu por tres personalidaes alemanes ya internacionales. El direutor del festival pue participar nes deliberaciones del xuráu pero nun tien votu. Los premios concedíos por esti xuráu son:
    • Osu d'Oru al Meyor Curtiumetraxe.
    • Osu de Plata - Premiu del Xuráu.
    • Premiu al Curtiu DAAD.
    • Curtiu candidatu de Berlín pa los Premios del Cine Européu.
  • Xuraos de la seición Xeneración: caúna de les competiciones d'esta seición tien dos xuraos. Un xuráu mozu, compuestu por once neñes y neños d'ente 11 y 14 años nel casu de Xeneración Kplus y por siete neñes y neños d'ente 14 y 18 años nel casu de Xeneración 14plus, y un xuráu internacional compuestu por tres profesionales pa caúna de les competiciones. Los premios daos en cada competición son:
    • Osu de Cristal a la Meyor Película.
    • Osu de Cristal al Meyor Curtiumetraxe.
    • Gran Premiu del Xuráu Internacional.
    • Premiu Especial del Xuráu Internacional.
    • Menciones Especiales (del xuráu mozu o del xuráu internacional).
  • Premiu GWFF a la Meyor Ópera Prima: concedíu dende 2006, el xuráu del premiu ta compuestu por tres persones y dotáu con 50.000€ que repártense ente'l productor y el direutor de la película ganadora. Amás, al direutor entrégase-y un visor de alta calidá, que sirve al tiempu como instrumentu útil y como troféu. Opten al premiu les óperes primes de les seiciones Competición, Panorama, Forum, Xeneración y Perspeutiva de cine alemán.
  • Osu d'Oru Honoríficu: col que la Berlinale pága-y tributu a figures relevantes del mundu del cine con una carrera artística esceicional. El premiu dáse-y al convidáu d'honor de la seición Homenaxe.
  • Xuraos independientes (nos que nengún de los sos miembros ye escoyíu pola Berlinale).
    • Premios del Xuráu Ecuménicu: dende 1992, esti xuráu representa a les organizaciones INTERFILM y SIGNIS (de la ilesia protestante y católica, respeutivamente). Ta formáu por seis miembros y premia a una película de la seición Competición y otros dos premios (de 2.500 € caún) a una película de la seición Panorama y otra de la seición Forum. Los premios danse a direutores que triunfen al retratar aiciones o esperiencies humanes en relaición colos evanxelios o que sensibilicen nos valores espirituales, humanos o sociales.
    • Premiu del Gremiu de Cines d'Arte y Ensayu d'Alemaña: el xuráu ta compuestu por tres miembros del gremiu y premia una película de la seición Competición.
    • Premiu Panorama del Públicu.
    • Premios del Xuráu FIPRESCI: la Federación Internacional de Prensa Cinematográfica premia la meyor película de caúna de les seiciones Competición, Panorama y Forum.
    • Premiu C. I. C. A. E.: la Confederación Internacional de Cines d'Arte y Ensayu forma un xuráu pa la seición Panorama y otru pa la seición Forum. Caún d'estos xuraos premia una película de la so seición.
    • Etiqueta Cine Europa: llanzáu per primer vegada en 2003 nel Festival de Cannes, el premiu créase pa ayudar a les películes europees a meyorar la so distribución. El xuráu ta formáu por cinco miembros y dende 2005 premia una película de la seición Panorama.
    • Premios Teddy: son los premios al cine LGTB más destacaos del mundu, compiten les películes de toles seiciones de la Berlinale y danse a les categoríes Meyor Película, Meyor Película Documental y Meyor Curtiumetraxe.
    • Premiu Amnistía Internacional.
    • Premiu Heiner Carow, col sofitu de la Fundación DEFA.