Espeyismu

De Wikipedia
Espeyismu nuna carretera.
Mecanismu d'un espeyismu. La densidá desigual del aire, por causa de ciertes temperatures, produz una refraición de la lluz del cielu. Ello, de la mesma, provoca que l'observador interprete la so procedencia dende'l suelu. Naturalmente, esto interprétase como un charcu d'agua que reflexa la lluz del cielu, pero nun ye'l casu.

Un espeyismu ye una ilusión óptica na que los oxetos alloñaos apaecen reflexaos nuna superficie llisa como si tuviera contemplándose una superficie líquida que, en realidá, nun esiste.

Mecanismu[editar | editar la fonte]

Nos desiertos tropicales, el aire en contautu col suelu chornizu se calez y el so densidá varia de tal manera que, contrariu a lo avezáu, l'aire más frío caltiénse enriba del más caliente, que ye calecíu pola radiación reflexada pel suelu. Esto crea una densidá desigual nel aire que-y da dellos índices de refraición. Poro, un rayu de lluz reflexáu por un oxetu alloñáu que va escontra baxo, y na direición del observador, va esperimentando refraiciones socesives al travesar les distintes capes d'aire; el so enclín escontra'l suelu ye cada vez menor y, en llegando a la horizontal, el rayu sufre nueves refraiciones, anque esta vegada escontra riba. Asina ye como, en describiendo una trayeutoria curva de convexidá dirixida escontra baxo, llega al güeyu del observador, que ve nel suelu (espeyismu inferior) una imaxe pocu neta del oxetu. Agora bien, como otros rayos de procedencia real lleguen tamién direutamente al güeyu del observador, ésti albidra de ver al empar l'oxetu (por casu, una palmera nun desiertu) y, al pie del mesmu, una segunda imaxe invertida, como si esta palmera reflexar nuna superficie líquida inesistente. Por tanto, nes hores más caloroses del branu, la imaxe del cielu paez venir del asfaltu de la carretera caliente, al empar qu'ésta paez moyada o encharcada pal observador.

Ye escepcional que la trayeutoria de los rayos lluminosos seya convexa escontra riba (espeyismu cimeru); de producise, un barcu, un monte, etc., paecen llexar na atmósfera.

Ver tamién[editar | editar la fonte]

Referencies[editar | editar la fonte]

Enllaces esternos[editar | editar la fonte]