Villardebeyo

Villardebeyo ye una parroquia del conceyu de Llanera n'Asturies, que llenda colos conceyos de Xixón y Corvera.

Xeografía

La parroquia tien una superficie de 12,7 km² y una población de 683 habitantes ((INE, 2009)). Allúgase na parte septentrional del conceyu, estremando al oeste coles parroquies de Ferroñes y Rondiella, al sur cola de Llugo, al oeste coles de Llugo y Pruvia y al norte colos conceyos vecinos de Corvera (parroquia de Solís) y Xixón (Serín).

Poblaciones

Villabona, el llugar más pobláu de la parroquia.

Sigún el nomenclátor de 2009, la parroquia comprende les poblaciones de:

• Alvares (llugar): 33 habitantes
• Beyo (llugar): 41 habitantes
• Castiello (llugar): 13 habitantes
• Cigoña (llugar): 8 habitantes
• La Miranda (llugar): 124 habitantes
• La Peña (llugar): 11 habitantes
• Piles (llugar): 4 habitantes
• El Pontón (llugar): 8 habitantes
• Tabladiello (llugar): 31 habitantes
• La Vega (llugar): 145 habitantes
• Villabona (llugar): 264 habitantes

Bernardo Alonso Ablanedo, cura de San Cucao, na so Descripción del conceyu de Llanera (1804), pal Diccionariu xeográfico-hestóricu d'Asturies de Francisco Martínez Marina, endicia que los vecinos de la parroquia de Villar de Beyo son 120 y 600 les «almes de confesión», que repártense ente les caseríes y los llugares de Beyo, Villar, La Temprana, Castiello, Piles, El Pontón, Cigoña, Vega de Formanes, Villabona y La Miranda. Posteriormente Martínez Marina, recoyó, pa la parroquia de «Villar de Beyo o Villardobeyo» los mesmos datos, únicamente ellevando les almes a 700.

Sigún el Diccionariu xeográfico-estadísticu d'España y Pertual, de Sebastián de Miñano y Bedoya y Tomás López de Vargas Machuca, de 1828, la feligresía de «Villar de Beyo o Villardobeyo» comprendía los llugares de Villar, La Temprana, Castiello, Piles, El Pontón, Cigoña, Vega de Formanes, Villabona y La Miranda. Asinamesmo, endicia que cuntaba con 143 vecinos y 700 habitantes.

Nel Diccionariu de Madoz (1845-1850), la feligresía de «Villardobeyo» comprende los llugares de Miranda, Piles, El Pontón, Tabladiello, La Vega y Beyo y tien una población de 146 vecinos y 496 almes.

Santuarios

La illesia y el cementeriu parroquiales alcuéntrense na llocalidá de Beyo. La illesia, baxo la alvocación de San Miguel, foi fundada nel sieglu IX ó X, calteniendo una ventana d'esa época.

Amás de la illesia parroquial esisten na parroquia 4 edificios dedicaos al cultu:

• La capiella de San Antolín, nel barriu de La Rotiella de Villabona
• La ermida de Nuesa Siñora de Formanes, en La Vega (anteriormente Vega de Formanes)
• La capiella del Palaciu de Villabona, dedicada a los Reis Magos
• La capiella de la Inmaculada, en La Miranda

Patrimoniu

Les Casones, antigua residencia d'emplegaos ferroviarios.

Llavaderu en La Rotiella

Dientro les llendes de la parroquia alcuéntrense diversos bienes qu'integren el padremuñu cultural del conceyu de Llanera, d'interés hestóricu, arqueolóxicu, artísticu y etnográficu.

Arquitectónicu

Los bienes d'interés arquitectónicu na parroquia son la ilesia parroquial de San Miguel, xunto cola so casa rectoral, na llocalidá de Beyo, el Palaciu de Villabona, la capiella de la Inmaculada, en La Miranda, y la ermita de Nuesa Siñora de Formanes, en La Vega. Toos ellos tán incluyíos nel Catálogu Urbanísticu, y los dos primeros nel Inventariu Arquitectónicu d'Asturies.

Hestóricu-industrial

Ye d'interés arquitectónicu y hestórico-social el conxuntu formáu pola estación de Villabona y les viviendes anexes pa ferroviarios, conocíes por Les Casones.

Arqueolóxicu

D'interés arqueolóxicu son los materiales llíticos de Granda, n'Alvares, y de Barandiallu, en La Vega, asina como la estructura defensiva romana de Santofirme.

Etnográficu

Les construiciones d'interés etnográficu son: La casa mariñana denomada Casa Amaro, en La Miranda, el llavaderu y abreviaderu de La Rotiella, en Villabona, el llavaderu de la rectoral de San Miguel, en Beyo y les paneres de Casa Bonifacio, en La Miranda.

Natural

D'alcuerdu al Decretu 145/01, ye d'interés singular el texu allugáu xunto a la ilesia parroquial de San Miguel, en Beyo.

Víes de comunicación

Palaciu de Villabona y cruceru de les llinies a Xixón (inferior) y a Avilés (soperior)

Pel territoriu de la parroquia discuerren dos llinies ferrovaries, d'anchor ibérico y pertenecientes a ADIF: Llión-Xixón y Villabona-San Xuan de Nieva. Nel so tarabazáu pela parroquia son de vía doblu lletrificada. Estes llinies cunten con dos estaciones de viaxeros, Villabona y Villabona-Tabladiello, nes que rialicen paraes los servicios correspondientes a les llinies C1 y C3 del noyu d'Asturies de Renfe Cercaníes.

Les prencipales víes de comunicación, per carretera, son l'AS-17 Avilés-Riañu (Llangréu), de la rede rexonal y l'AS-325 del Altu de la Miranda a Serín, llocal de primer orde, qu'enllaza nel Altu de la Miranda cola primer. Pel postreru oriental de la parroquia discuerre l'A-66, pero ensin accesos.

Centru penitenciariu

Na redolada de Tabladiello alcuéntrase'l Centru Penitenciariu de Villabona, únicu centru penitenciariu d'Asturies.

Referencies

• Sociedá Asturiana d'Estudios Económicos y Industriales (2008). «Nomenclátor de entidades de población de Asturias 2008». Consultáu'l 6 de enero de 2010.
• Plan Xeneral d'Ordenación Urbanística del Conceyu de Llanera
• Diccionariu de Madoz
• Diccionariu xeográfico-estadísticu d'España y Pertual, de Sebastián de Miñano y Bedoya y Tomás López de Vargas Machuca (1828)
• Diccionariu xeográfico-hestóricu d'Asturies, Francisco Fernández Marina
• Descripción del conceyu de Llanera, Bernardo Alonso Ablanedo, 21 de xineru de 1804