Villardebeyo

Villardebeyo
Alministración
País	España
Autonomía	Principáu d'Asturies
Provincia	provincia d'Asturies
Conceyu	Llanera
Tipu d'entidá	parroquia d'Asturies
Nome oficial	Villardebeyo (ast)
Códigu postal	33422
Xeografía
Coordenaes	43°28′15″N 5°50′19″W / 43.47091°N 5.83871°O
	Villardebeyo Villardebeyo (Asturies)
Superficie	14.282 km²
Altitú	201 m
Llenda con	Ferroñes, Rondiella, Llugo, Pruvia, Solís y Serín
Demografía
Población	645 hab. (1r xineru 2021)
Porcentaxe	4.62% de Llanera; 0.06% de provincia d'Asturies; 0.06% de Principáu d'Asturies; 0% de España
Densidá	45,16 hab/km²
Más información
Estaya horaria	UTC+01:00

Villardebeyo^[3] ye una parroquia del conceyu de Llanera n'Asturies, que llenda colos conceyos de Xixón y Corvera.

Xeografía[editar | editar la fonte]

La parroquia tien una superficie de 12,7 km² y una población de 683 habitantes ((INE, 2009)). Allúgase na parte septentrional del conceyu, estremando al oeste coles parroquies de Ferroñes y Posada, al sur cola de Llugo, al oeste coles de Llugo y Pruvia y al norte colos conceyos vecinos de Corvera (parroquia de Solís) y Xixón (Serín).

Poblaciones[editar | editar la fonte]

Villabona, el llugar más pobláu de la parroquia.

Según el nomenclátor de 2009, la parroquia compriende les poblaciones de:

Alvares (llugar): 33 habitantes
Beyo (llugar): 41 habitantes
Castiello (llugar): 13 habitantes
La Cigoña (llugar): 8 habitantes
La Miranda (llugar): 124 habitantes
La Peña (llugar): 11 habitantes
Piles (llugar): 4 habitantes
El Pontón (llugar): 8 habitantes
Tabladiello (llugar): 31 habitantes
La Vega (llugar): 145 habitantes
Villabona (llugar): 264 habitantes

Bernardo Alonso Ablanedo, cura de San Cucao, na so Descripción del conceyu de Llanera (1804), pal Diccionariu xeográfico-históricu d'Asturies de Francisco Martínez Marina, endicia que los vecinos de la parroquia de Villar de Beyo son 120 y 600 les «almes de confesión», que repártense ente les caseríes y los llugares de Beyo, Villar, La Temprana, Castiello, Piles, El Pontón, Cigoña, Vega de Formanes, Villabona y La Miranda. Posteriormente Martínez Marina, recoyó, pa la parroquia de «Villar de Beyo o Villardobeyo» los mesmos datos, únicamente elevando les almes a 700.

Según el Diccionario geográfico-estadístico de España y Portugal, de Sebastián de Miñano y Bedoya y Tomás López de Vargas Machuca, de 1828, la feligresía de «Villar de Beyo o Villardobeyo» comprendía los llugares de Villar, La Temprana, Castiello, Piles, El Pontón, Cigoña, Vega de Formanes, Villabona y La Miranda. Asinamesmo, endicia que cuntaba con 143 vecinos y 700 habitantes.

Nel Diccionariu de Madoz (1845-1850), la feligresía de «Villardobeyo» compriende los llugares de Miranda, Piles, El Pontón, Tabladiello, La Vega y Beyo y tien una población de 146 vecinos y 496 almes.

Santuarios[editar | editar la fonte]

La ilesia y el cementeriu parroquiales alcuéntrense na llocalidá de Beyo. La ilesia, baxo l'alvocación de Samiguel, foi fundada nel sieglu IX ó X, calteniendo una ventana d'esa época.

Amás de la ilesia parroquial esisten na parroquia 4 edificios dedicaos al cultu:

La capilla de San Antolín, nel barriu de La Rotella de Villabona
La capillade Nuestra Señora de Formanes, en La Vega (anteriormente Vega de Formanes)
La capilla del Palacio de Villabona, dedicada a los Reis Magos
La capilla de la Inmaculada, en La Miranda

Patrimoniu[editar | editar la fonte]

Dientro les llendes de la parroquia alcuéntrense diversos bienes qu'integren el padremuñu cultural del conceyu de Llanera, d'interés históricu, arqueolóxicu, artísticu y etnográficu.

Arquiteutónicu[editar | editar la fonte]

Los bienes d'interés arquiteutónicu na parroquia son la ilesia parroquial de San Miguel, xunto cola so casa rectoral, na llocalidá de Beyo, el Palacio de Villabona, la capilla de la Inmaculada, en La Miranda, y la capilla de Nuestra Señora de Formanes, en La Vega. Toos ellos tán incluyíos nel Catálogu Urbanísticu, y los dos primeros nel Inventariu Arquiteutónicu d'Asturies.

Históricu-industrial[editar | editar la fonte]

Ye d'interés arquiteutónicu y histórico-social el conxuntu formáu pola estación de Villabona y les viviendes anexes pa ferroviarios, conocíes por Les Casones.

Arqueolóxicu[editar | editar la fonte]

D'interés arqueolóxicu son los materiales llíticos de Granda, n'Alvares, y de Barandiallu, en La Vega, asina como la estructura defensiva romana de Santufirme.

Etnográficu[editar | editar la fonte]

Les construcciones d'interés etnográficu son: La casa mariñana denomada Casa Amaro, en La Miranda, el llavaderu y bebederu de La Rotella, en Villabona, el llavaderu de la rectoral de Samguel, en Beyo y les paneres de Casa Bonifacio, en La Miranda.

Natural[editar | editar la fonte]

D'alcuerdu al Decretu 145/01, ye d'interés singular el texu allugáu xunto a la ilesia parroquial de Samiguel, en Beyo.

Víes de comunicación[editar | editar la fonte]

Pel territoriu de la parroquia discuerren dos llinies ferrovaries, d'anchor ibérico y pertenecientes a ADIF: Llión-Xixón y Villabona-San Xuan de Nieva. Nel so tarabazáu pela parroquia son de vía doblu lletrificada. Estes llinies cunten con dos estaciones de viaxeros, Villabona y Villabona-Tabladiello, nes que realicen paraes los servicios correspondientes a les llinies C1 y C3 del noyu d'Asturies de Renfe Cercaníes.

Les principales víes de comunicación, per carretera, son l'AS-17 Avilés-Riañu (Llangréu), de la rede rexonal y l'AS-325 del Alto la Miranda a Serín, local de primer orde, qu'enllaza nel Alto la Miranda cola primer. Pel postreru oriental de la parroquia discuerre l'A-66, pero ensin accesos.

Centru penitenciariu[editar | editar la fonte]

Nel monte de La Llaniza, na raya de Tabladiello y Alvares, alcuéntrase'l Centru Penitenciariu de Villabona, únicu centru penitenciariu d'Asturies.

Referencies[editar | editar la fonte]

↑ URL de la referencia: https://sede.asturias.es/bopa/2021/12/31/2021-11353.pdf.
↑ Afirmao en: Modelo Digital del Terreno de España de 5 metros. Editorial: Institutu Xeográficu Nacional d'España.
↑ «Espediente colos topónimos oficiales de Llanera». BOPA.

Sociedá Asturiana d'Estudios Económicos y Industriales (2008). «Nomenclátor de entidades de población de Asturias 2008». Consultáu'l 6 de xineru de 2010.
Plan Xeneral d'Ordenación Urbanística del Conceyu de Llanera
Diccionariu de Madoz
Diccionariu xeográfico-estadísticu d'España y Portugal, de Sebastián de Miñano y Bedoya y Tomás López de Vargas Machuca (1828)
Diccionariu xeográfico-históricu d'Asturies, Francisco Fernández Marina
Descripción del conceyu de Llanera, Bernardo Alonso Ablanedo, 21 de xineru de 1804

Enllaces esternos[editar | editar la fonte]

	Parroquies de Llanera
Ables \| Arlós \| Bonielles \| Cayés \| Ferroñes \| Llugo \| Pruvia \| Posada \| San Cucao \| Santa Cruz \| Villardebeyo

[9331ddb436e36ab52098a97df03b297fa118637d-1] URL de la referencia: https://sede.asturias.es/bopa/2021/12/31/2021-11353.pdf.

[295a86791112e9f6fb69c894402525c5375513b3-2] Afirmao en: Modelo Digital del Terreno de España de 5 metros. Editorial: Institutu Xeográficu Nacional d'España.

[toponimia-llanera-3] «Espediente colos topónimos oficiales de Llanera». BOPA.

[1]

[2]

[3]