Bandera de Guinea

Bandera oficial de Guinea

La bandera nacional de Guinea foi adoptada'l 10 de payares de 1958. Ta compuesta por tres franxes verticales del mesmu tamañu de color roxu (la más averada al mástil), mariellu (la central) y verde. Son los mesmos colores que figuren nes banderes d'Etiopía y de Ghana que tamién son los del movimientu panafricanu.

El roxu foi adoptáu n'homenax a los que morrieron na llucha escontra'l colonialismu. Ye'l color venceyáu colos trabayadores de la industria y del campu, razón pola que tamién s'asocia col términu “Trabayu” del lema nacional.

El mariellu ye'l símbolu del oru guineanu y el sol africanu. El sol ye fonte d'enerxía qu'entrega la so lluz con igualdá a tolos homes, d'esta manera'l mariellu ye'l color que se rellaciona col términu “Xusticia” del lema.

El verde representa les viesques y l'agricultura del país. Ye'l color que simboliza la cabera pallabra del lema: "Solidaridá".