Bandera d'Etiopía

De Wikipedia
Ficha d'escuduBandera d'Etiopía
Datos
Entidá Etiopía
Fecha d'adopción 31 d'ochobre de 1778 (245 años)
Proporción 2:1
Colores verde, mariellu, bermeyu y azul
Elementos representaos campo (es) Traducir (verde, mariellu, bermeyu)
escudu d'Etiopía
Cambiar los datos en Wikidata
Bandera del Imperiu d'Etiopía na qu'apaez la figura del Lleón de Yudá (1897-1936; 1941-1974)
Bandera d'Etiopía (1975-1987 y 1991-1996)

La versión d'anguaño de la bandera d'Etiopía adoptóse'l 6 de febreru de 1996. Ta compuesta por tres franxes horizontales d'igual tamañu: la franxa d'arriba ye de color verde, la central ye mariella y la d'abaxo colorada. Na parte central, ocupando la franxa central y parte de les esteriores, figura l'escudu d'Etiopía, formáu por un círculu azul con una estrella mariella de cinco puntes.

El significáu de los colores de la bandera varió a lo llargo'l tiempu, anguaño'l color verde representa la fertilidá del país, el mariellu simboliza la llibertá relixosa y el coloráu evoca a quienes morrieron defendiendo la integridá nacional.

Los colores panafricanos -coloráu, verde, mariellu- tienen la so bas na bandera etíope, una de les más antigües del continente africanu. L'esquema tricolor de la bandera ye perantiguu, anterior a la creación del estandarte del Imperiu d'Abisinia. Los tres colores tamién componíen la bandera creada en 1897, un añu dempués de la Batalla d'Adowa, na que los etíopes se defendieron del espansionismu colonial italianu.

Mientres la esistencia de la monarquía etíope apaecía representáu na bandera un lleón coronáu, conocíu como'l Lleón de Yudá que portaba un estandarte con una cruz incorporada nel estremu del mástil, símbolu de la venceya del país cola Ilesia ortodoxa etíope.

Cola desapaición de la monarquía etíope en 1975, la bandera nacional contó colos mesmos elementos pero'l Lleón de Yudá retiróse y nun s'incorporó escudu nengún o emblema nuevu. Esta bandera usóse hasta 1987 y, llueu, dende 1991 hasta 1996.

Ente 1987 y 1996 nel centru de la bandera figuró l'escudu de la República Popular d'Etiopía, domináu por una estrella mariella de cinco puntes asitiada na so parte superior y arrodiáu per una corona o guirnalda vexetal.

Ver tamién[editar | editar la fonte]

Referencies[editar | editar la fonte]

Enllaces esternos[editar | editar la fonte]