IBM

IBM Personal System/2 Model 25.

International Business Machines Corporation (IBM, tamién nomada Big Blue) ye una empresa con base n'Armonk, Nueva York, Estaos Xuníos. Dedícase a facer y vender hardware, software y servicios venceyaos a la informática. Tien más de 330.000 trabayadores per tol mundu, y ye la empresa de teunoloxíes de la información más grande del mundu.

Amás, ye de xuru una de les más antigües, si non la más antigua, nel so sector. El so orixe ta na empresa Tabulating Machine Corporation, qu'entamó Herman Hollerith en 1896. Hollerith trabayara pa la Oficina del Censu de los Estaos Xuníos, y desendolcara máquines tabuladores qu'emplegaben tarxetes afuracáes pa representar y procesar los datos de la xente. Con eses ferramientes, el censu de 1890 fízose muncho más aína que'l censu de 1880. Hollerith desendolcó máquines p'afuracar les tarxetes y pa lleeles.

Dempués, la Tabulating Machine Corporation amestóse a otres empreses y creóse IBM. El so fundador, Thomas J. Watson, fízose cargu de la empresa cuandu nun tenía más que 400 trabayadores, y en 1924 camudó-y el nome pa IBM. En 1952, más del 90% de les máquines tabulaores nos Estaos Uníos yeren de IBM.

La empresa bien ceo dexó otros productos de precisión que tenía (sistemes pa fichar nes empreses, reloxes, báscules) y centróse nes tarxetes afuracáes y nes máquines pa procesar información. Demientres la Segunda Guerra Mundial y nos años siguientes, trabayó pal exércitu de los Estaos Xuníos, tando nes vistigaciones más punteres de la informática naquella dómina. Nos años 1960 desendolcó los modelos más importantes de mainframe.

La importancia de IBM ye grandísima. Amás del so tamañu descomanáu (sólo la división de software, si se dixebrase del restu, sería la segunda empresa de software más grande del mundu detrás de Microsoft) pue considerase responsable de dellos finxos na hestoria de la informática. Ficieron el primer discu duru, les primeres bases de datos rellacionales, o los disquetes. Tamién desendolcó'l PC, un ordenador personal que ye la base de la mayoría de los que s'empleguen anguañu. L'ordenador de la familia AS/400 ye'l más vendíu del mundu, si dexamos aparte'l PC. IBM tien dellos centros de vistigación perimportantes, y trabayaores de la empresa ganaron cinco Premios Nobel, cuatro Premios Turing y munchos otros.

Últimamente, IBM dedícase abondo al desendolcu de software llibre y de códigu abiertu.

Enllaces esternos

• Wikimedia Commons tien conteníu multimedia tocante a IBM.
• IBM España (en castellanu)