Software llibre

De Uiquipedia
Saltar a: navegación, buscar

El software llibre, como lu define la Free Software Foundation, ye software que se pue emplegar, copiar, estudiar, camudar y redistribuir sin restricciones. Esa llibertá ye central al conceutu de "software llibre"; poro, lo contrario de software llibre ye software propietariu, y non el software que se vende pa ganar perres, como'l software comercial. El software llibre tamién se llama libre software (dizse así n'inglés tomando la pallabra libre prestada del español), FLOSS, o software de códigu abiertu (por embargu, la espresión cabera nun diz esactamente lo mismo).

Pa estremar el software llibre del software gratuitu (n'inglés les dos coses dícense igual), Richard Stallman, fundador del movimientu del software llibre, dixo que'l software llibre ye una cuestión de llibertá, non de perres (esta desplicación necesítase n'inglés, llingua na que, como se dixo más arriba, la pallabra free quier dicir igualmente gratis y llibre, y mucha xente tracamundia'l significáu). Quier dicir que los usuarios del software tienen la llibertá de cooperar y de controlar el software qu'empleguen.

Munchu software llibre distribúyese gratis n'Internet, pero nun ye una condición necesaria; pue vendese.

Llibertaes del Software llibre[editar | editar la fonte]

Mapa conceutual del software llibre
Llibertá Descripción
0 la llibertá d'usar el programa, con cualesquier propósitu.
1 la llibertá d'estudiar cómo funciona el programa y camudalu, adautándolu a les tos necesidaes.
2 la llibertá de distribuyir copies del programa, colo que puedes aidar al próximu.
3 la llibertá de meyorar el programa y facer públiques eses meyores a los demás, de mou que tola comunidá se beneficie.
Les llibertaes 1 y 3 requieren accesu al códigu fonte porque estudiar y modificar software ensin el códigu fonte ye mui pocu viable.