Manuel Álvarez Laviada

Manuel Alejandro Álvarez-Laviada Alzueta, (Trubia, Uviéu, 1894 - Madrid, 1958), foi un escultor asturianu, magar que la mayor parte de so vida la pasara en Madrid, pa onde marchó cola so familia en 1901, por más que nunca perdió los llazos cola so tierra, como lo demuestren el númberu d'obres suyes n'Asturies.

Entamó a dar los primeros pasos nel mundu de la escultura de la mano de so tíu, Cipriano Fogueras. Fizo los sos estudios en Madrid y tuvo pensionái na Academia de Belles Artes de Roma, nesta dómina fizo dellos viaxes per Europa (Francia, Bélxica y Grecia) p'ampliar conocimientos. Durante la so estancia en Roma fadría la so obra Diana (de la que esiste una réplica nel parque d'Isabel la Católica de Xixón), que presentaría na Segunda Bienal de Roma de 1925. En Roma entamaría amistá con escultores como Arturo Martini y Artilio Selva.

Algamó la cátedra na Real Academia de Belles Artes de San Fernando de Madrid y anque nun yera amigu d'esposiciones, participó na Esposición Universal de Barcelona de 1929, onde-y dieron la segunda medalla y na Esposición Nacional de Belles Artes de Madrid nel añu 1930 na qu'algamó la primera medalla, cola so obra Las Driadas, consagrándose como artista.

Monumentu a los "Héroes del Simancas", en Xixón (Colexu) de la Inmaculada. Obra de Manuel Álvarez Laviada

Demientres la Guerra Civil Española dexaría de llau la escultura y dedícase a collaborar cola Xunta de Defensa del Patrimoniu Artísticu de Madrid.

Obres

• 1931 Monumento a Leopoldo Alas "Clarín" nel Campo San Francisco n'Uviéu.
• 1933 Monumentu a José Tartiere en collaboración con Víctor Hevia nel Campo San Francisco n'Uviéu
• Escultures en la Universidá Llaboral de Xixón
• 1948 Bustu de D. Cifuentes Suárez. Xixón
• 1950 Alegoría. Parque Isabel la Católica. Xixón. Esta obra tuvo inicialmente nel edificiu del Institutu Nacional de Previsión de Xixón, que foi valtáu en 2006
• 1951 Monumentu a Evaristo Valle. Xixón
• 1954 Monumentu a la Inmaculada. Pamplona
• 1955 Monumentu a Alexander Fleming. Xixón
• 1956 Monumentu a Manolete. Córdoba
• Asunción de la Virxen. Santander
• 1958 Monumentu a los Héroes de Simancas. Xixón

Enllaz esternu

• Monumentu nel Parque d'Isabel la Católica. Alegoría