Daido Juku

De Wikipedia
Saltar a navegación Saltar a la gueta
Daido Juku
大道塾
Tamién Kudo, Karate Daido Juku, Kakuto Karate Daidojuku (hasta’l 2001)
Fecha de fundación 1981
País d'orixe Flag of Japan.svg Xapón
Fundador Takashi Azuma
Cabezaleru actual Takashi Azuma
Ancestros Kyokushinkai, Yudu y delles otres artes marciales
Deporte olímpicu Non
Sitiu Oficial [1]

Daido Juku (大道塾, Daidō Juku) ye la organización que dirixe l'arte marcial del Kudo (空道, Kūdō), fundada nel 1981 por Takashi Azuma. Azuma, antiguu campeón de Kárate Kyokushin, dexó la organización del Kyokushinkai pa crear el Daido Juku na ciudá xaponesa de Sendai, al norte d'Honshu

Historia[editar | editar la fonte]

La estrena pública del Daido Juku foi en 1981 nos Campeonatos d'Hokutoki Karate, o Hokutoki a cencielles. Denomáu primeramente Kakuto Karate Daidojuku (格闘空手大道塾, Kakutō Karate Daidōjuku: "Daidojuku Kárate de Combate"), el nome del estilu cambióse en visu a la reconocencia de les sos téuniques úniques y heterodoxes como un arte marcial amestáu. En 2001, nuna rueda de prensa oficial dada pol fundador y presidente del Daido Juku, Takashi Azuma, renomó esti arte como Kudo. Esta nueva denomación dio al Kudo la oportunidá de convertise nun deporte xaponés budo cola mesma categoría oficial que’l Yudu, Aikido o Kendo. Kudo y Daido Juku son marques rexistraes pa tol mundu y tolos sos instructores y xefes de sucursal tán certificaos pola Federación Internacional de Kudo (KIF, poles sos sigles n’inglés.)

Actualmente Azuma ye cinturón negru 8u Dan pol Kyokushin Budokai, dau pol Shihan Jon Bluming, y 8u Dan en Daido Juku, dau pola xunta direutiva del Daido Juku.

Carauterístiques[editar | editar la fonte]

Competidor de Kudo usando una téunica de sumisión (llave de brazu) contra l'oponente.

Daido Juku tórnase lliteralmente a "Escuela de la Gran Vía". Lliga téuniques que daquella nun taben presentes nos estilos de kárate a contautu plenu. Al ser Azuma cinturón negru tercer Dan de Yudu y cuartu Dan de Kyokushinkai, yera consciente del potencial qu'ello tenía pa un arte marcial híbridu. La disciplina nun había tar torgada poles llendes d'un estilu únicu sinón que diba usar téuniques de distintes artes marciales, sobre too, de la qu'apaeció a primeros de los 80, el Yudu y el Kárate. A finales de los 80 y primeros de los 90 l'estilu escomenzó a incorporar delles téuniques del muay thai, boxéu, jujutsu, sambo, llucha de sumisión y otres artes marciales, esbillando bien cada téunica pa usala nel estilu Daido Juku. Ún de los oxetivos principales del Daido Juku yera la creación d'un estilu de llucha adautable y realista ensin comprometer la seguridá. Azuma creó asina un estilu qu'incorporaba tanto téuniques ofensives como defensives incluyendo puñetazos a la cabeza, coldazos, cabezazos, valtos del yudu, llaves del jujutsu y otres téuniques de llucha tanto en pie como en suelu.

Equipamientu[editar | editar la fonte]

Los competidores de Daido Juku lleven un “kudogi” oficial (el cuerpu y mangues de la chaqueta, neto que’l judogi de texíu cenciellu, tán fechos d'una sola pieza de texíu, non como’l karategi tradicional, u les mangues van cosíes al cuerpu). Esti diseñu del kudogi failu ideal pa téuniques de proyeición y agarre. En competición tamién s’usen proteutor xenital, guarda bucal, encaños de manes homologaos, y guantes y cascu (“SuperSafe”) homologaos de Kudo. Los guantes son del estilu de los de MMA, que cubren la moñeca, el revés del puñu y los deos hasta’l segundu nudiellu. El cascu SuperSafe ye un cascu únicu d'espluma desendolcáu pol Hanshi Masayuki Hisataka pal sistema de combate Koshiki prauticáu polos karateques de Shorinjiryu al envís de protexese de mancadures na cara y traumatismos na cabeza. Esti cascu permite a los lluchadores de Daido Juku solmenar puñetazos y coldazos a la cara, lo que ta torgao nes principales variantes de Kyokushinkai.

Fuera de los círculos del Daido Juku esti cascu conozse en chancia como "cascu espacial." Na siguiente cita, el Jukucho (fundador y presidente del Daido Juku) Azuma refierse al cascu talu: “Llama-ylu como demonios queráis: cascu espacial, careta de buzu, lo que sía… esto ye Kudo, esto ye Daido Juku.” (Jukucho ri)

Lluchadores famosos[editar | editar la fonte]

  • Minoki Ishihara, el karateca que lluchó con Royce Gracie nel UFC 2, fuera enantes campeón de Kárate Daido Juku.
  • Semmy Schilt ganó’l Campeonatu Hokutoki dos veces (división de pesos open, 1996, 1997).
  • Yoshinori Nishi, que ganó’l Campeonatu Hokutoki en 1984 y 1985 (división de pesos open), compitió nel “RINGS” y dempués fundó’l Wajyutsu Keisyukai, una escuela de MMA promotora de Caol Uno y Akira Shoji ente otros.
  • Kenichi Osada, que participó y ganó siete años.
  • Lee Hasdell, pioneru inglés de MMA que lluchó nel K-1, RINGS y Cage Rage.
  • Ogawa Hideki, que participó nos campeonatos nacionales de Xapón en -230, quedando siempre’l primeru sacantes un añu que foi segundu, cuando intentó la categoría de -240. Tamién campeón de -230 l'añu 2001.

Enllaces esternos[editar | editar la fonte]