Clara de Rueda

Clara de Rueda
Vida
Nacimientu	As Campas,
Nacionalidá	España
Muerte	As Campas, 1917
Oficiu	curiadora

Clara de Rueda (¿?As Campas – 1917, As Campas), conocida como a bruxa das Campas, foi una célebre curandera, adivina o bruxa. Tuvo gran popularidá a principios del sieglu XX.

Fontes históriques

Tres son les fontes escrites que disponemos pa conocela: un artículu de José Díaz Fernández, publicáu na publicación Castropol, un pasaxe de la novela Recelo, de José Fernández-Arias Campoamor y un apartáu del llibru de Daniel Vargas Vidal, Añoranzas y recuerdos de Tapia de Casariego. Contrasta tanto interés frente a la escasez de noticies, y ye señal manifiesta de la importancia que tuvo la bruxa nos años finales del sieglu XIX y primeros del XX.

Son estos testimonios de valor desigual, y en nengún casu rigorosos. Los de Díaz Fernández y Arias Campoamor paecen ser la resultancia d'una visita a la bruxa que dambos convirtieron en material lliterariu, y tán cargaos d'un escepticismu nel que nun queda llugar pal interés antropolóxicu. Daniel Vargas Vidal, sicasí, nun llegó (n'apariencia) a conocela, pero trescribe lo qu'oyera a la xente creyente de la so redolada, y por ello apurre datos de mayor interés.

Lo que sabemos

N'As Campas nun queden nin los cimientos, sacante unes piedres del barganal de la finca, medio tapecíes pola sebe. Poro, la casa de la bruxa tien de reconstruyise siguiendo lo que dicen los testos. Según diz Díaz Fernández:

Clara de Rueda vive nun cabañu negru escondida ente romeru; tan escondida qu'apenes s'acolumbra dende'l camín y pa llegar a ella hai qu'internase per un senderu que se retuerci en caprichoses curves.

Esta descripción coincide cola que fai Arias Campoamor:

Unu de los factores que poníen el sellu esmolecedor ya inquietante na vivienda de l'adivinadora, yera'l ver les miserables parés envueltes y escondíes ente ramasques de lloréu y mirtu... Taba al fin d'un caminín arrodiáu de mirtu qu'estremaba'l güertu, a veces xardín, onde en verdá, nun se fixera cultivu de nenguna flor exótica, nin de nengún árbol estrañu, de que la so acopa colgaren frutos de zusmios misteriosos.

Pa Díaz Fernández, l'interior de la casa resulta daqué decepcionante.

El cabañu ye escura y estrecha, ensin más lluz que la de la puerta y una pequeña abertura na paré trasera; ye como la vivienda d'un ermitañu na paz del monte... Entré. Al topame nel interior de la cabaña confieso que tuvi un pocu de mieu... L'aposentu nun tien nada de particular nun siendo'l so negror alarmante y unos bagules centenarios onde la sibila guarda cirios y santos mutilaos

Arias Campoamor escribió sobre'l sótanu de la casa en Recelo:

La casa tenía dos cuartos, ensin ventana dalguna. El primeru recibía la lluz pela puerta y allumaba incompletamente'l cuartu interior. El primeru venía ser recibidor, cocina y llocutoriu. De les parés anegrazaes pol fumu del llar, escolgaben dellos cuadros piadosos y delles semeyes de familia. El cuartu interior taba zarráu, tenebrosamente, nel misteriu. Ellí nun entraron enxamás los estraños. Decíase qu'en suelu había un soterrañu apináu de calaveres y signos de comunicación con ultratumba. Pero nél nun entró enxamás la mirada del curiosu. Al traviés de la puerta percibíase un catre coles ropes desfeches y ensin aguzar l'olfatu, llegaba a les ñarices un desagradable golor de suciedá y mugor...

Los gallegos que llegaben hasta As Campas a consultala, y yeren munchos, solíen facer nueche na casa que llamen "de la torre", pos la bruxa precisaba d'esti plazu pa dar la so respuesta. Veníen cargaos de pollos, tocinos, chorizos y otres ayalgues aldeanes, porque Clara de Rueda nun almitía dineru, sinón solo lo que quixera dase de voluntá.

Enllaces esternos

• Datos: Q5771163