Cebalrai

De Wikipedia
Saltar a navegación Saltar a la gueta
Cebalrai
Cebalrai
Constelación Ophiuchus
Ascensión reuta α 17h 43min 28,35s
Declinación δ +04º 34’ 02,3’’
Distancia 82 ± 2 años lluz
Magnitú visual +2,75 a +2,77
Magnitú absoluta +0,75 a +0,77
Lluminosidá 64 soles
Temperatura 4600 K
Masa 2 soles (aprox)
Radiu 12,5 soles
Tipu espectral K2III
Velocidá radial -12 km/s

Cebalrai (β Ophiuchi / β Oph / 60 Ophiuchi / HD 161096)[1] ye una estrella de la constelación de Ophiuchus, el portador de la culiebra, de magnitú aparente +2,75. Como interés hai de solliñar que sirve pa indicar la posición de la constelación de Taurus Poniatovii, güei sumida, asitiada al este d'esta estrella.[2]

Nome[editar | editar la fonte]

El términu Cebalrai provién del árabe كلب الراعي (kalb al-rā‘ī), «el perru del pastor». Tamién recibe los nomes de Cheleb, Kelb Alrai, o a cencielles Alrai.

Xuntu a γ Ophiuchi, na astronomía china yera conocida como Tsung Ching.[3]

Carauterístiques[editar | editar la fonte]

Distante 82 años lluz del Sistema Solar, Cebalrai ye una xigante naranxa del tipu de Arcturus (α Bootis), anque más pequeña y menos brillosa qu'ésta. De tipu espectral K2III y 4600 K de temperatura efectivo, tien un radiu 12,5 vegaes más grande qu'el radiu solar y ye 64 vegaes más lluminosa qu'el Sol. Estos parámetros dexen envalorar la so masa —aprosimao'l doble de la masa solar— y probablemente agora funde heliu en carbonu nel so nucleu internu.[2] Presenta un conteníu metálico comparable a la solar y tien una edá averada de 3820 millones d'años.[4]

Cebalrai amuesa una llixera variabilidá nel so rellumu —el so magnitú absoluta varia ente +0,75 y +0,77— que paez que ta rellacionada más con cambeos nel tamañu de la estrella que con variaciones na mesma lluminosidá. Midíes espectrocópicas amuesen que la estrella bazcuya con periodu de 0,26, 13,1 y 142 díes; el periodu más llargu débese a manches escuros na so superficie qu'entren y salen del campu de visión, en concordanza cola velocidá de rotación reparada de 2 km/s. Sicasí, el periodu de 13,1 díes paez debese a sutiles pulsaciones que'l so orixe nun ye del tou conocíu.[2]

Referencies[editar | editar la fonte]